O‘zbekiston hukumati qarori bilan “O‘zbekiston Vazirlar Mahkamasi huzuridagi Yengil sanoatni rivojlantirish agentligi qoshidagi Yengil sanoatni qo‘llab-quvvatlash jamg‘armasi mablag‘lari hisobidan yengil sanoat korxonalarini moliyaviy qo‘llab-quvvatlash tartibi to‘g‘risida”gi nizom tasdiqlandi.
Ushbu nizom Yengil sanoatni qo‘llab-quvvatlash jamg‘armasi mablag‘lari hisobidan yengil sanoat korxonalarini moliyaviy qo‘llab-quvvatlash tartibini belgilaydi.
Nizomga ko‘ra, Yengil sanoatni rivojlantirish agentligi tomonidan tadbirkorlarga quyidagi yo‘nalishlar bo‘yicha xarajatlarni qoplab berish uchun moliyaviy yordam ko‘rsatiladi:
🔹 Xalqaro brendlarni jalb qilish xarajatlari bo‘yicha:
xalqaro brendlarni jalb qilish, ularning egalari bilan hamkorlikni yo‘lga qo‘yish, shu jumladan sorsing kompaniyalari xizmatlari uchun xarajatlar;
ekonom klass transport xarajatlari;
O‘zbekiston hududida mehmonxona xarajatlari;
tarjimonlik xizmati xarajatlari.
🔹 Mutaxassislarni o‘qitish xarajatlari bo‘yicha:
o‘quv-treninglarda qatnashish to‘lovi;
transport xarajatlari;
mehmonxona xarajatlari.
Moliyaviy yordam olish uchun tadbirkorlar tomonidan taqdim etilgan ariza va zarur hujjatlar ariza qabul qilingan kundan boshlab 7 ish kuni davomida ko‘rib chiqiladi.
Agentlik qabul qilingan qaror to‘g‘risida tadbirkorlarga 1 ish kuni mobaynida xabarnoma yuborishi lozim.
Rasmiy ma’lumotlarga ko‘ra, ushbu tartib yengil sanoat korxonalarining xalqaro bozorda raqobatdoshligini oshirish, yangi brendlar va texnologiyalarni jalb etish hamda kadrlar salohiyatini kuchaytirishga xizmat qilishi kutilmoqda.
