«O‘zbekistonda xorijiy davlatlarda berilgan diplomlarni tan olish «Ta’lim to‘g‘risida»gi Qonuni hamda Vazirlar Mahkamasining «Xorijiy davlatlarda ta’lim olganlik to‘g‘risidagi hujjatlarni tan olish tartibi haqida»gi Nizom talablari asosida amalga oshiriladi. Bugungi kunda O‘zbekiston, Qirg‘iziston, Turkmaniston, Tojikiston va Qozog‘iston diplomlarini o‘zaro tan olish bo‘yicha xalqaro shartnoma mavjud emas. Mazkur davlatlarda xorijiy davlatlar tomonidan berilgan ta’lim olganlik haqidagi diplomlarni tan olish ularning milliy qonunchiligida belgilangan talablar asosida amalga oshiriladi», deyiladi xabarda.
Avvalroq, Qozog‘iston, Qirg‘iziston, Tojikiston, Turkmaniston va O‘zbekiston oliy o‘quv yurtlari tomonidan berilgan diplomlarni o‘zaro tan olish to‘g‘risida kelishib olgani haqida Qozog‘istonning Zakon nashri xabar berdi. Qayd qilinishicha, Qozog‘iston Vazirlar Mahkamasi 2025 yil 12 noyabrda tegishli hukumatlararo bitimni tasdiqlash to‘g‘risidagi qarorni imzolagan.
Shuningdek, Turkmaniston, O‘zbekiston, Qirg‘iziston va Tojikiston oliy ta’lim to‘g‘risidagi hujjatlarni o‘zaro tan olish to‘g‘risidagi bitimni imzolagani haqida Turkmenportal nashri ham xabar bergan edi.
