Qoʻshimcha funksionallar
-
Tungi ko‘rinish
Rossiyada aktrisa Aglaya Tarasova giyohvand modda kontrabandasi bo‘yicha shartli hukm oldi
Moskva viloyati Domodedovo shahar sudi aktrisa Aglaya Tarasovani giyohvand moddalar kontrabandasi ishi bo‘yicha aybdor deb topib, unga uch yil shartli ravishda ozodlikdan mahrum etish va 200 ming rubl jarima jazosini tayinladi. Prokuror 31 yoshli aktrisa uchun uch yarim yil shartli jazo so‘ragan, uning so‘zlariga ko‘ra, Tarasovani «jamiyatdan izolyatsiya qilmasdan ham tuzatish mumkin». Sud majlisi 26 noyabr kuni yopiq tartibda bo‘lib o‘tdi.
Himoya tomonidan guvoh sifatida mashhur aktyorlar Leonid Yarmolnik, Yevgeniy Tsiganov va Yuliya Snigir chiqish qilgan, avvalroq Sergey Bezrukov va Yevgeniy Mironov ham Tarasova uchun yozma tavsiyalar bergan. Ular sudda hamkasbini mas’uliyatli, mehnatsevar, haddan tashqari iste’mol qilish holatida biror marta ko‘rmaganini ta’kidlagan.
Tarasova 28 avgust kuni Tel-Avivdan Moskvaga, Domodedovo aeroportiga kelganda ushlangan. Tekshiruv paytida uning veyp qurilmasi ichida 0,38 gramm gashish (kannabis) moyi aniqlangan. Bu modda Isroilda qonuniy, ammo Rossiyaga olib kirish qat’iy taqiqlangan. Qo‘zg‘atilgan ish Rossiya JKning 229.1-moddasi («giyohvand moddalar kontrabandasi») bo‘yicha yuritildi, mazkur modda bo‘yicha aktrisaga avvalroq 3 yildan 7 yilgacha ozodlikdan mahrum etish va 1 mln rublgacha jarima tahdid solayotgani xabar qilingan edi.
5 sentabr kuni sud uni uy qamog‘iga o‘tkazish o‘rniga ayrim harakatlarini cheklash tarzida yengilroq ehtiyot chorasini tanladi: Tarasovaga internetdan foydalanish, tungi payt uydan chiqish taqiqlangan, o‘zi esa pasportini ixtiyoriy ravishda topshirgan. Sud jarayonida aktrisa o‘z aybini to‘liq tan oldi, ammo ko‘rsatmalarini o‘zgartirib, veyp unga 2022 yilda Isroildagi tadbirkor tanishi tomonidan sovg‘a qilinganini, unda qonuniy kannabisning oz miqdori bor deb o‘ylaganini aytdi. Bu voqeani u «katta, ahmoqona xato» va «og‘ir saboq» deb atadi.
Aglaya Tarasova – aktrisa Kseniya Rappoportning qizi. U tomoshabinlarga birinchi navbatda «Interny» seriali, «Lyod», «Lyod-2», «Lyod-3», «Xolop-2» filmlari va «Besprinsipnyye» serialidagi rollari orqali tanish.
