Intellektual mulk ekspertizasi muddati ikki barobarga qisqartiriladi

Prezident qarori bilan intellektual faoliyat natijalarini rag‘batlantirish va sohaga zamonaviy axborot-kommunikatsiya texnologiyalarini joriy etishga qaratilgan qo‘shimcha chora-tadbirlar belgilab qo‘yildi. Unga ko‘ra, 2026–2027 yillarda intellektual mulk obektlarini ro‘yxatdan o‘tkazish bo‘yicha ekspertiza muddatlarini zamonaviy texnologiyalardan foydalangan holda ikki barobarga qisqartirish maqsad qilingan.

“Intellektual faoliyat natijalarini rag‘batlantirish hamda sohaga zamonaviy axborot-kommunikatsiya texnologiyalarini joriy etishni kengaytirishga oid qo‘shimcha chora-tadbirlar to‘g‘risida”gi prezident qarori (PQ–358-son, 27 noyabr 2025 yil) qabul qilindi.

Qarorga muvofiq, 2026–2027 yillarda intellektual mulk sohasini rivojlantirishning asosiy maqsadli ko‘rsatkichlari quyidagilar etib belgilandi, jumladan:

mamlakatda ro‘yxatdan o‘tkazilgan intellektual mulk obektlari sonini 100 mingtaga yetkazish;
intellektual mulk obektlarini ro‘yxatdan o‘tkazish jarayonida zamonaviy axborot-kommunikatsiya texnologiyalaridan foydalanish orqali ekspertiza muddatlarini 2 barobarga qisqartirish.

Shuningdek, qaror bilan Adliya vazirligining mavjud “Sanoat mulki muhofazasi” va IP Protection axborot portallari negizida yagona “Intellektual mulk muhofazasi” portali ishga tushirilishi belgilangan. Ushbu platforma orqali:

intellektual mulk masalalariga oid murojaatlarni onlayn qabul qilish;
intellektual mulk obektlari bilan bog‘liq shartnomalarni onlayn tarzda tuzish;
kontrafakt tovarlar, shuningdek, intellektual mulk huquqlarini buzganligi uchun faoliyati cheklangan veb-saytlar to‘g‘risidagi ma’lumotlarni joylashtirish imkoni yaratiladi.

Kutilishicha, qabul qilingan chora-tadbirlar intellektual mulk huquqlarini himoya qilish tizimini zamonaviylashtirish, ixtirochilar va mualliflarni yanada faolroq ro‘yxatdan o‘tishga rag‘batlantirish, shuningdek, barcha jarayonlarni raqamlashtirish hisobidan shaffoflik va tezkorlikni ta’minlashga xizmat qiladi.