Shavkat Mirziyoyev byurokratiyani qisqartirish va sun’iy intellektga bag‘ishlangan xalqaro forumlar ochilishida ishtirok etadi

Bugun Toshkent shahridagi Xalqaro kongress markazida byurokratik to‘siqlarni qisqartirish, davlat boshqaruvini zamonaviylashtirish va sun’iy intellekt texnologiyalarini joriy etishga bag‘ishlangan xalqaro forumlar boshlanadi. Ochilish tadbirida O‘zbekiston prezidenti Shavkat Mirziyoyev ishtirok etishi kutilmoqda.

Forumlar doirasida davlat xizmatlarini raqamlashtirish, idoralar faoliyati ochiqligini oshirish, qaror qabul qilish jarayonlariga innovatsion yechimlarni tatbiq etish, shu jumladan sun’iy intellekt texnologiyalaridan samarali foydalanish masalalari muhokama etilishi nazarda tutilgan.

Dastur doirasida davlat rahbari Birlashgan Arab Amirliklari hukumat ishlari bo‘yicha vaziri Muhammad al-Gargaviy boshchiligidagi delegatsiya bilan uchrashuv o‘tkazadi. Muloqot chog‘ida davlat boshqaruvi samaradorligini oshirish, raqamli hukumat, innovatsion menejment va sun’iy intellektni joriy etish sohasida tajriba almashish hamkorligini rivojlantirish masalalarini ko‘rib chiqish rejalashtirilgan.

Tadbirlar doirasida O‘zbekistonning ochiq, zamonaviy va innovatsion davlat boshqaruviga o‘tish borasidagi ustuvor yo‘nalishlari, xalqaro sheriklar bilan qo‘shma loyihalarni amalga oshirish imkoniyatlari muhokama qilinishi kutilmoqda.