AQSh 19 mamlakat fuqarolari uchun kuchaytirilgan immigratsion cheklovlar joriy qildi (ro‘yxat)

Vashingtondagi otishmadan so‘ng Oq uy ma’muriyati «yuqori xavfli» 19 mamlakat fuqarolaridan grin karta yoki AQSh fuqaroligiga arizalar qabulini muzlatdi. Endi ushbu davlatlarning AQShga oldinroq kelgan fuqarolari ham «chuqur tekshiruv»ga olinadi. Ichki xavfsizlik vazirligi ro‘yxatga kiritilgan davlatlar sonini 32 tagacha kengaytirmoqchi.

{Yii::t(}

O'tkazib yuborish 6s

O'tkazib yuborish

O‘zgarishlar 2 dekabr kuni AQSh Fuqarolik va Immigratsiya Xizmatlari veb-saytiga joylashtirilgan siyosiy memorandumda bayon qilingan. Mazkur agentlik immigratsion imtiyozlar bo‘yicha barcha arizalarni ko‘rib chiqish va tasdiqlash vakolatiga ega, deb yozmoqda Associated Press nashri.

Ushbu qaror Tramp ma’muriyati «yuqori xavfli» deb ta’riflagan 19 mamlakat fuqarolari uchun grin karta arizalari yoki fuqarolikka qabul qilish kabi keng ko‘lamli immigratsiya qarorlarini muzlatib qo‘yadi. Memorandumda aytilishicha, ushbu «pauza»ni qachon bekor qilish Immigratsiya xizmati direktori Jozef Edlou ixtiyoriga bog‘liq.

Oq uy ma’muriyati joriy yil iyun oyida milliy xavfsizlik bilan bog‘liq xavotirlarni tilga olib, 12 mamlakat fuqarolari uchun AQShga kirishni taqiqlagan va yana yetti mamlakat fuqarolari uchun kirishni cheklagan edi.

Ushbu 19 davlat qatoriga: Afg‘oniston, Myanma, Chad, Kongo Respublikasi, Ekvatorial Gvineya, Eritreya, Gaiti, Eron, Liviya, Somali, Sudan, Yaman, Burundi, Kuba, Laos, Sierra-Leone, Togo, Turkmaniston va Venesuela kiradi.

Oldin, ushbu 19 davlatdan AQShga kirgan muhojirlarga nisbatan hech qanday choralar ko‘rilmagan edi. Ammo endilikda AQShda hozir bo‘lgan shu mamlakat fuqarolari — ular qachon kelganidan qat’i nazar yanada chuqur tekshiruv ostiga olinadi.

Shu bilan birga, Bayden administratsiyasi davrida mamlakatga kirgan muhojirlar uchun «tasdiqlangan imtiyoz so‘rovlari»ning barchasi bo‘yicha tekshiruv o‘tkaziladi.

AQSh rasmiy idoralari ushbu kuchaytirilgan nazoratni – Afg‘oniston fuqarosi bo‘lgan shaxs tomonidan ikki Milliy gvardiya askariga qilingan hujum bilan izohladi. Oq uy yaqinidagi otishma oqibatida Milliy gvardiya askarlaridan biri halok bo‘lgan va boshqasi og‘ir yaralangan edi.

«Aniqlangan xavotirlar va Amerika xalqiga tahdidga muvofiq, 2021 yil 20 yanvardan keyin AQShga kirgan xavf guruhiga mansub mamlakatlar fuqarolari bo‘yicha to‘liq qayta ko‘rib chiqish, ehtimoliy suhbat va zarur bo‘lsa qayta suhbatni o‘tkazish zarur deb hisoblaydi,» deyildi agentlik bayonotida.

Agentlik seshanba kungi memorandumda 90 kun ichida muhojirlarning ustuvor ro‘yxati tuzilishini va zarur bo‘lsa immigratsiya nazorati yoki boshqa huquqni muhofaza qiluvchi organlarga yuborilishini bildirdi.

CNN nashri manbalariga ko‘ra, Ichki xavfsizlik vaziri Kristi Noem AQShga kirish taqiqi ro‘yxatiga kiritilishi tavsiya qilinayotgan davlatlar soni hozirgi 19 mamlakatdan 30–32 tagacha kengayishi mumkinligini aytgan. Biroq ro‘yxatga aynan qaysi mamlakatlar qo‘shilishi va qachon e’lon qilinishi hozircha noma’lum.

Tramp o‘zi ham avvalroq, qaysi davlatlarni nazarda tutayotganini ko‘rsatmasdan, «uchinchi dunyo davlatlari» deb atagan mamlakatlardan migratsiyani «doimiy ravishda to‘xtatish» bilan tahdid qilgandi.

Otishmadan buyon Oq uy ma’muriyati mamlakatdagi muhojirlarni, shuningdek, AQShga kelmoqchi bo‘lganlarni yanada qat’iy tekshirish bo‘yicha qator qarorlarni e’lon qildi.

Agentlik, shuningdek, o‘tgan hafta barcha boshpana qarorlarini to‘xtatganini, Davlat departamenti esa AQShning harbiy harakatlariga ko‘mak ko‘rsatgan afg‘onlar uchun vizalarni bekor qilganini ma’lum qildi.

Tanqidchilar Tramp administratsiyasining harakatlarini muhojirlarga nisbatan jamoaviy jazo sifatida baholagan.