O‘zbekistonda 300 ta mahallada quyosh stansiyalari o‘rnatiladi

Prezident Shavkat Mirziyoyev ishtirokidagi tadbirda aholini muqobil energiya manbalaridan foydalanishini qo‘llab-quvvatlash siyosati kelgusida ham izchil davom ettirilishi ta’kidlandi.

Ma’lum qilinishicha, kelgusi yilda Xitoy tajribasi asosida mamlakat bo‘ylab 300 ta mahalla hududida aholi bilan kooperatsiya shaklida jami 107 megavatt quvvatga ega quyosh stansiyalari o‘rnatiladi.

Ijtimoiy yo‘naltirilgan ushbu loyiha doirasida 30 mingta kambag‘al oila “yashil” energiyaga ulanadi. Ularning o‘z ehtiyojidan ortiqcha ishlab chiqargan elektr energiyasi umumiy tarmoqqa uzatilib, oilalar uchun qo‘shimcha daromad manbai yaratiladi.

Shuningdek, tadbirkorlar ham suv resurslaridan unumli foydalanib, joriy yil 40 megavatt quvvatga ega kichik va mikro GESlar qurishdi. Natijada 120 million kilovatt-soat elektr energiyasi ishlab chiqarilgani hamda bu loyihalar ular uchun barqaror qo‘shimcha daromad manbaiga aylangani qayd etildi.

Keyingi yilda esa 65 megavattli kichik va mikro GES barpo etilishi rejalashtirilgan. Prezident ta’kidlaganidek, ushbu loyihalar hisobiga 80 mingta xonadonda elektr ta’minoti tubdan yaxshilanadi.