Vilnyusda OAV erkinligi bo‘yicha so‘nggi yillardagi eng yirik namoyish bo‘lib o‘tdi

Norozilik aksiyasi, jumladan, teleradiokompaniya bosh direktorini ishdan ozod etish tartibini soddalashtirishni ko‘zda tutuvchi o‘zgarishlarga qarshi yo‘naltirilgan edi. Namoyishni tashkil etuvchilarga ko‘ra, taklif etilayotgan tuzatishlar konstitutsiyaga zid, Yevropa huquqi me’yorlariga to‘g‘ri kelmaydi va LRT yaratayotgan kontentga siyosiy aralashuv uchun zamin yaratadi.

Hukumat koalitsiyasidagi «Zarya Nemana», «Litva dehqonlar va yashillar ittifoqi» hamda «Xristian oilalar ittifoqi» partiyalari tomonidan ishlab chiqilgan va noyabr oyi oxirida Seym tomonidan birinchi o‘qishda ma’qullangan qonun loyihasiga ko‘ra, LRT kengashi endi bosh direktorni oldingiday uchdan ikki qismi emas, oddiy ko‘pchilik ovoz bilan ishdan olish huquqiga ega bo‘ladi. Shuningdek, uni vazifasidan chetlatishni «jamoat manfaati» bilan asoslash talabi ham bekor qilinadi.

Bundan tashqari, hukumat koalitsiyasi deputatlari deyarli bir ovozdan 2026–2028 yillar davrida LRT budjeti miqdorini «muzlatib qo‘yish» (oshirmaslik) uchun ham ovoz berdi.

Mediakompaniya xodimlari, shuningdek Yevropa Kengashi, Yevropa teleradiodasturlar ittifoqi (EBU) va turli jurnalistlar kasaba uyushmalari ogohlantirishicha, ushbu o‘zgarishlar Litva jamoat teleradiotarmog‘ining mustaqilligiga salbiy ta’sir ko‘rsatishi mumkin.