Ukraina yetakchisi Kiyev chorshanba kuni AQShga tinchlik rejasining yangilangan versiyasini topshirishini ham aytdi. Uning so‘zlariga ko‘ra, Ukraina, AQSh va Kiyevning Yevropadagi ittifoqchilari o‘rtasidagi muzokaralar jarayoni doirasida tinchlik sulhi uchun asos bo‘lishi kerak bo‘lgan jami uchta hujjat muhokama qilinmoqda.
Quyida – Volodimir Zelenskiyning asosiy bayonotlari keltiriladi.
Ukrainadagi saylovlar haqida
«Hamkorlarimizga hurmat saqlagan holda aytamanki, Ukrainadagi saylovlar masalasi, menimcha, avvalo xalqimizga bog‘liq va bu boshqa davlatlar xalqining emas, Ukraina xalqining masalasi.
Ochiq aytaman, saylovga tayyorman. Agar biz hokimiyatga yopishib olganimiz yoki shaxsan men prezidentlik kursisiga yopishib olganim va shuning uchun urush tugamayotgani haqidagi shamalarni eshitdim – bu, to‘g‘risini aytsam, mutlaqo noxolislik.
Saylovlarni o‘tkazish uchun ikkita masala bor: birinchi navbatdagisi xavfsizlik – buni qanday o‘tkazish kerak, zarbalar, raketalar ostida qanday qilish kerak; shuningdek, harbiylarimiz masalasi: ular qanday ovoz berishi bo‘yicha. Siz buni bilasiz va takrorlamoqchi emasman. Ikkinchi masala – saylovlar o‘tkazilishining qonuniyligi uchun qonuniy asos.
Va bu masalani bugun AQSh prezidenti, hamkorlarimiz ko‘tarayotgani uchun men juda qisqa javob beraman: men saylovga tayyorman. AQShdan bu borada yordam berishni so‘rayman, AQSh yevropalik hamkasblar bilan birgalikda saylovlar uchun xavfsizlikni ta’minlashi mumkin, shunda keyingi 60–90 kun ichida Ukraina saylovlarni o‘tkazishga tayyor bo‘ladi. Bunga shaxsan menda iroda va tayyorgarlik bor.
Yana bir gap. Agar ish shunday ketadigan bo‘lsa, men fraksiyamiz deputatlaridan, umuman olganda, bizning parlamentariylarimizdan harbiy holat davrida qonunchilik asoslari va Saylov to‘g‘risidagi qonunni o‘zgartirish imkoniyati to‘g‘risida qonunchilik takliflarini tayyorlashni so‘rayman. Men ertaga Ukrainada bo‘laman, hamkorlardan takliflar kutaman, deputatlarimizdan ham takliflar kutaman – va saylovga borishga tayyorman».
Tinchlik rejasi va uchta hujjat haqida
«20 banddan iborat doiraviy hujjat bor. U doimo o‘zgarib turadi va bu normal holat. Ukraina, Yevropa va tinchlik manfaatlariga javob berishi kerak bo‘lgan jonli tuzilma.
Ikkinchi hujjat – bu xavfsizlik kafolatlari, biz buning ustida ishlayapmiz. Men harbiylarimizdan tegishli takliflarni va ularning amerikalik hamkorlar bilan muloqotini kutyapman. Va bularning barchasi „ko‘ngillilar koalitsiyasi“ asoslari bilan birlashtirilishi kerak. Buni aniq aytish qiyin, lekin siz buni ko‘rasiz. Xavfsizlik kafolatlari – biz va AQSh, biz va yevropaliklar o‘rtasidagi muhim hujjatdir.
