Xorijdan pul o‘tkazmalari 11 oyda 17,3 mlrd dollarga yetdi

Avvalroq iqtisodchi pul o‘tkazmalaridagi yuqori o‘sishsiz aholi daromadlari qanday o‘zgarishini hisoblab ko‘rgan va o‘tkazmalarning ko‘payishi 8 ta viloyat aholisini kambag‘allashishdan saqlab qolgani ma’lum bo‘lgandi.

Foto: Reuters

2025 yilning yanvar–noyabr oylarida O‘zbekistonga 17,3 mlrd dollar miqdorida pul o‘tkazmalari kelib tushdi. Bu – o‘tgan yilning mos davriga nisbatan 25 foizga ko‘p, deya ma’lum qildi Markaziy bank.

Qayd etilishicha, o‘tkazmalarning oshishi so‘mning mustahkamlanishiga yordam bergan.

Avvalroq iqtisodchi Mirkomil Xolboyev aholi daromadlari bo‘yicha 9 oylik rasmiy statistikaga asoslanib hisob-kitob yuritgan va shunday xulosaga kelgan edi: agar pul o‘tkazmalarida o‘sish bo‘lmaganida, O‘zbekiston aholisining jon boshiga umumiy daromadlari bu yil o‘smagan bo‘lardi. Jumladan, o‘tkazmalarning oshishi 8 ta viloyatda aholini kambag‘allashishdan saqlab qolgan.

Valuta bozoridagi holat

2025 yilning 11 oyida jismoniy shaxslar tomonidan banklarga 19,4 mlrd dollar sotilgan (o‘sish 33 foiz) va 10,6 mlrd dollar xarid qilingan (o‘sish 25 foiz).

Bu davrda milliy valuta almashuv kursi 7,5 foizga mustahkamlangan bo‘lib, Markaziy bank buni quyidagi omillar bilan izohladi:

eksport tushumlarining oshishi;
xorijiy kreditlarning jalb qilinishi;
import to‘lovlari hajmlarining nisbatan barqarorlashuvi;
xalqaro pul o‘tkazmalari hajmining sezilarli darajada o‘sishi;
investitsiya hajmlari, jumladan to‘g‘ridan to‘g‘ri xorijiy investitsiyalarning oshishi.