Alisher Sultonov lavozimidan olindi

Alisher Saidabbosovich Sultonov O‘zbekiston Respublikasi Prezidentining energetik xavfsizlik bo‘yicha vakili lavozimidan ozod etildi. Bu haqda prezident matbuot xizmati xabar berdi.

Alisher Sultonov 2023 yilda (aniq sanasi noma’lum) O‘zbekiston prezidentining neft-gaz, kimyo va energetika masalalari bo‘yicha maslahatchisi etib tayinlangan, lekin bu tayinlov haqida rasman xabar berilmagan edi.

U 2025 yil iyul oyida prezident maslahatchisi lavozimidan ozod etilib, davlat rahbarining energetik xavfsizlik bo‘yicha vakili lavozimiga tushirilgan edi.

Ma’lumot uchun, 58 yoshli Sultonov faoliyati davomida energetika sohasida muhim lavozimlarda ishlagan.

2013−2015 yillarda “O‘zbekneftgaz” raisi o‘rinbosari, 2015-2018 yillarda “O‘zbekneftgaz” raisi bo‘lgan. 2017 yilda bosh vazir o‘rinbosari — geologiya, yoqilg‘i-energetika kompleksi, kimyo, neft-kimyo va metallurgiya sanoati masalalari kompleksi rahbari etib tayinlangan.

2019 yil boshida Energetika vazirligi tashkil etilganida, Alisher Sultonov vazirlikning ilk rahbari etib tayinlangan edi. U vazir lavozimida 3 yil ishlagach, 2022 yil aprelida “salomatligi tufayli” lavozimidan ozod etilgan, keyinroq prezident maslahatchisi bo‘lib ishlayotgani oydinlashgan edi.