Oliy sud: 273-modda bilan sudlanganlar soni 2,8 mingdan oshdi

Oliy sud axborot xizmati bergan ma’lumotga muvofiq, 2024 yilda ham 273-modda bo‘yicha sudlanganlar soni yuqori bo‘lgan: 3 020 nafar shaxs sudlanib, ularning 2 806 nafariga ozodlikdan mahrum qilish, 214 nafariga esa ozodlikdan mahrum qilish bilan bog‘liq bo‘lmagan jazolar (jarima, axloq tuzatish ishlari, ozodlikni cheklash va shartli hukm) tayinlangan. Shuningdek, 8 nafar shaxsga nisbatan tibbiy yo‘sindagi majburlov choralari qo‘llangan. 

Joriy yilning 11 oyi yakunlariga ko‘ra esa, 273-modda bo‘yicha sudlangan 2 875 nafar shaxsdan 225 nafariga ozodlikdan mahrum qilish bilan bog‘liq bo‘lmagan jazolar tayinlangan, 5 nafar shaxsga nisbatan tibbiy yo‘sindagi majburlov choralari qo‘llangan. 

Ma’lumot uchun, Jinoyat kodeksining 273-moddasi giyohvandlik vositalari (ularning analoglari) yoki psixotrop moddalarni o‘tkazish maqsadida qonunga xilof ravishda tayyorlash, olish, saqlash hamda ularni qonunga xilof ravishda o‘tkazish bilan bog‘liq qilmishlar uchun javobgarlikni belgilaydi.