«Suv zaxiramiz o‘tgan yilning shu davriga nisbatan 6,5 mlrd kub metrga kam» – suv xo‘jaligi vaziri

10 dekabr kuni Oliy Majlis Qonunchilik palatasida suv xo‘jaligi vaziri Shavkat Hamroyev 2025−2028 yillarga mo‘ljallangan Suv resurslarini boshqarish va irrigatsiya sektorini rivojlantirish dasturining ijrosi haqida ma’lumot berdi.

Vazirning ta’kidlashicha, 2025 yilda O‘zbekiston bo‘ylab qishloq xo‘jaligi mahsulotlarini yetishtirish uchun 40 mlrd kub metrdan ortiq suv yetkazib berilgan. O‘z navbatida, oldindan zaxiralar yaratilgani, kanallarni betonlashtirish hamda suvni tejovchi texnologiyalar qo‘llanishini kengaytirish hisobiga suvni tejash bo‘yicha yaxshi natijalarga erishilgan.

«Bugungi kun holatida transchegaraviy suv omborlari bilan hisoblaganda, suv zaxiramiz o‘tgan yilning shu davriga nisbatan 6,5 milliard kub metrga kam. Ichki suv omborlarimizda esa 2,7 milliard kub metr kam suv yig‘ilgan», - degan Shavkat Hamrayev.

Suv xo‘jaligi vazirining qo‘shimcha qilishicha, so‘nggi 5 yilda suv xo‘jaligi tizimini tubdan isloh qilish, mavjud suv zaxiralaridan tejamkorlik asosida foydalanishga 60 trln so‘m budjet mablag‘lari hamda 622 mln dollar xorijiy investitsiyalar yo‘naltirildi. Natijada 2025 yilga kelib, respublika bo‘yicha suv tejaydigan texnologiyalarning umumiy maydoni 2,6 mln gektarga yoki sug‘oriladigan maydonga nisbatan 60 foizga yetkazilgan.