Toshkent bosh rejasini o‘zgartirish bo‘yicha qaror loyihasi ishlab chiqilmoqda – qurilish vaziri

Toshkent shahrining o‘tgan yili tasdiqlangan bosh rejasini o‘zgartirish haqidagi hukumat qarori taxminan 1 oy ichida qabul qilinishi kutilyapti. Bu haqda qurilish vaziri Sherzod Hidoyatov 17 dekabr kuni Savdo-sanoat palatasida bo‘lib o‘tgan tadbirkorlar bilan ochiq muloqotda ma’lum qildi.

Muloqotda “Mustang” benzin shoxobchalari tarmog‘i egasi Komiljon Islomov so‘z olib, Sergeli tumanidan auksion orqali yer sotib olgani, lekin Toshkent bosh rejasi qabul qilinganidan keyin bu yer “konservatsiya” toifasidagi yerlar qatoriga tushgani, qurilish taqiqlanganini aytgan.

“Bu menimcha Toshkent shahrida juda katta muammo. Bungayam qanadir yechim bormikan?” – deya so‘radi Komiljon Islomov.

Qurilish vaziri Sherzod Hidoyatov bosh reja qabul qilinishi (2024 yil 24 dekabr)dan oldin auksionga chiqarilgan joylar yo konservatsiyaga tushib, yoki qavat cheklovi to‘g‘ri kelmay turgan holatlar borligi uchun, bu borada hozir qaror loyihasi tayyorlanayotganini aytdi.

“Mumkin bo‘lgan joylarga ruxsat beriladigan bo‘lyapti. Mumkin bo‘lmaydigan joylar bo‘yicha esa, hokimiyat ularga [auksionda to‘lagan] mablag‘larini qaytarib beradigan bo‘lyapti. Bu qarorimiz taxminan 1 oy ichida chiqadi. Shunda bosh reja chiqquncha auksionga qo‘yilgan joylar bo‘yicha bosh rejaga o‘zgartirishlar kiritiladi”, – dedi Hidoyatov.

Avvalroq Kun.uz bosh rejaga zid bo‘lishiga qaramay, ilgari surilayotgan yirik qurilish loyihalaridan ayrimlari haqida yozgandi. Ular shaharning markaziy nuqtalariga oid bo‘lib, bosh rejada ruxsat etilganidan karrasiga baland qilib loyihalashtirilgan.