Тошкентдаги собиқ “Чорсу” меҳмонхонаси ўрнида Yangi Chorsu номли мажмуа қурилиши 2025 йил охиригача бошланиши кутилмоқда. Kun.uz хусусий инвестор томонидан ўтган ҳафта жамоатчиликка тақдимот қилинган лойиҳадаги бинолардан бири 30 қаватдан баландроқ эканига эътибор қаратди.
Пойтахт бош режасига кўра эса, бу жойда янги қуриладиган объектларнинг баландлиги 20 қаватдан ортиқ бўлмаслиги керак.
Kun.uz сўровига жавобан Тошкент шаҳар қурилиш бош бошқармаси бошлиғи Азиз Худойназаровнинг маълум қилишича, Yangu Chorsu мажмуаси бўйича лойиҳалар ҳали кўриб чиқиш учун тақдим қилинмаган ва тасдиқланмаган.
“Қурилиш вазирлиги қурувчи компаниянинг лойиҳаси учун рухсат бермаган. Буларга 30 қават қилиш ёки бошқаси бўйича хулоса берилмаган, лойиҳа ҳали тасдиқланмаган.
Иккинчи масала: бу материал [шаҳар архитектура] кенгашига расман тақдим қилингани ҳам йўқ. Ўзлари қандайдир тақдимот қилишган бўлиши мумкин, аммо ҳужжатлар вазирликка расман тақдим қилинмаган.
Фақатгина ҳужжатларни келгусида лойиҳалаштиришга рухсатнома берилган, бу лойиҳа келишилди дегани эмас, бу – ундан олдинги жараён учун бериладиган рухсат”, – деди Худойназаров.
Унинг қўшимча қилишича, компания жамоатчиликка кўрсатган лойиҳа “шунчаки бизнес режа бўлиши мумкин, лекин у расман тасдиқланмагунча юридик кучга эга бўлмайди”.
Yangi Chorsu лойиҳаси ҳақида
1982 йилда қурилган “Чорсу” меҳмонхонаси 2000-йиллардан буён фойдаланилмай келинаётган эди. Бино 2025 йилга келиб демонтаж қилинди. Техник экспертизада иншоот конструкцияси жиддий деформацияга учраган ва реконструкция қилиш мумкин эмас деган хулосага келинган.
Унинг ўрнида Manar Development компанияси Yangi Chorsu мажмуасини барпо этмоқчи. Компания 23 сентябр кунги матбуот анжуманида жамоатчиликка тақдимот қилди. Лойиҳа турар жойлар, меҳмонхона, савдо ва кўнгилочар масканларни ўз ичига олади; қиймати 100 млн долларга баҳоланган.
