“Credit House” ishi bo‘yicha sud boshlanmoqda

Toshkentda oson shartlar bilan uy olib berishni va’da qilgan “Credit House” va “In Fin Stroy Invest” bilan bog‘liq jinoyat ishi yuzasidan tergov harakatlari yakunlanib, ish mazmunan ko‘rib chiqish uchun sudga yuborilgani ma’lum qilingandi.

Mazkur ish jinoyat ishlari bo‘yicha Yakkasaroy tumani sudi sudyasi Baxodir Qayumov tomonidan ko‘rib chiqiladi. Dastlabki sud majlisi joriy yil 25 dekabr kuni soat 14:00 ga belgilangan. Bu haqdagi ma’lumot Oliy sudning sud majlislari onlayn jadvaliga joylashtirildi. Undan ko‘rinishicha, jabrlanuvchilarning umumiy soni 1766 nafarni tashkil etmoqda.

Eslatib o‘tamiz, Toshkent shahrida oson shartlarda uy olib berishni va’da qilib, minglab odamlarni chuv tushirgan “Credit House” ishi doirasida 9 kishi ayblangan.

Jumladan, Baxtiyor Amzayev, Dmitriy Bajyenov, Robiya Galyamova, Klara Talipova, G‘ayrat Mirkamalov va Bahrom Hikmatullayev Jinoyat kodeksining 168-moddasi 4-qismi “a,v” bandlari (uyushgan guruh tomonidan juda ko‘p miqdorda firibgarlik), 170-moddasi 2-qismi “a,v” bandlari (mulkiy zarar yetkazish), 177-moddasi 4-qismi “a,b” bandlari (juda ko‘p miqdorda valuta qimmatliklarining qonunga xilof muomalasi), 178-moddasi 3-qismi (chet el valutasini yashirish), 184-moddasi 3-qismi (juda ko‘p miqdordagi soliqlar yoki yig‘imlarni to‘lashdan bo‘yin tovlash), 189-moddasi (savdo yoki xizmat ko‘rsatish qoidalarini buzish), 192¹¹-moddasi 2-qismi “a,b” bandlari (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) va 243-modda (jinoiy faoliyatdan olingan daromadlarni legallashtirish) bilan ayblanmoqda.

Shuningdek, Alisher Shamsiddinovga Jinoyat kodeksining 168-moddasi 4-qismi “a,v”, 170-modda 2-qismi “a,v”, 177-moddasi 4-qismi “a,b”, 192¹¹-moddasi 2-qismi “a,v” va 243-modda bilan, Shoira Rahimova va Shuxrat Mahamadovga Jinoyat kodeksining 168-moddasi 4-qismi “a,v”, 170-modda 2-qismi “a,v”, 177-moddasi 4-qismi “a,b”, 178-modda 3-qismi, 192¹¹-moddasi 2-qismi “a,v”, 243-modda bandlari bo‘yicha ayblov e’lon qilingan.

Jinoyat natijasida jabrlanuvchilarga yetkazilgan zararning aniq miqdori hozircha ma’lum emas. Dastlabki tergov organi bu ma’lumotni ochiqlamagan. Kun.uz manbalari umumiy zarar 1 trillion so‘mdan oshiq ekanini aytgan. Agar bu tasdiqlansa miqdor jihatdan O‘zbekistonda shu paytgacha sodir etilgan firibgarlik jinoyatlari ichida rekordi bo‘lishi mumkin.