Google Rossiyadan o‘z serverlarining bir qismini olib chiqmoqda

Google Amerika kompaniyasi Rossiyadagi internet-provayderlarni o‘z serverlarining bir qismini olib ketish niyati haqida ogohlantirgan, deb xabar qildi 26 dekabr, juma kuni RBK agentligi manbalariga tayanib. Ularning aytishicha, kompaniya foydalanuvchilarga kontentni yetkazib berishni tezlashtirish uchun ishlatiladigan Dell R720 serverlarini ekspluatatsiyadan chiqarib tashlashni rejalashtirmoqda.

Gap Google Global Cache tizimida ishlatiladigan uskunalar haqida ketmoqda. Bu serverlar YouTube videolarini, xaritalarni, Android ilovalari va Chrome brauzeri yangilanishlarini, shuningdek Google qidiruvidagi tasvirlarni saqlash va uzatish uchun qo‘llanadi. Ukrainada urush boshlanganidan keyin kompaniya Rossiyada bunday turdagi yangi serverlarni o‘rnatishni to‘xtatgan.

Xabarnomaga ko‘ra, uskunalarni ekspluatatsiyadan chiqarishni 2026 yil 26 yanvardan boshlash rejalashtirilgan. Kompaniya bunga sabab sifatida Dell R720 serverlari ishlab chiqarishdan olingani va kafolat muddatiga ega emasligini ko‘rsatgan. Google, shuningdek, bunday mashinalar trafikning juda kichik qismini qayta ishlashini bildirgan. Shu bilan birga, Rossiyada joylashgan Google Global Cache’ning qolgan serverlari ishlashda davom etadi.

Provayderlardan biri RBK’ga Google qo‘shimcha xatda mazkur serverlarni o‘chirishni, chiqarib olishni va uskunani olib ketish uchun manzilni bildirishni so‘raganini aytgan. Uning so‘zlariga ko‘ra, Dell R720 serverlarining bir qismi allaqachon olib chiqilgan. Ta’kidlanishicha, demontaj va olib chiqish ishlari IT-uskunalarning “hayot sikli”ni boshqarish, jumladan demontaj va utilizatsiyaga ixtisoslashgan Yevropa kompaniyasi — MPK Asset Solutions tomonidan amalga oshirilmoqda.

Google Ukrainaga Rossiya qurolli bosqinidan keyin Rossiyadagi tijoriy faoliyatini to‘xtatgan va ofisini yopgan, faqat bepul servislarini qoldirgan. Kompaniyaning Rossiyadagi yuridik shaxsi — OOO “Gugl” 2023 yil oktyabrda bankrot deb topilgan.

Google ketganidan keyin Rossiyadagi Google Global Cache serverlarini modernizatsiya qilmagan. Keyinchalik bu holatdan Roskomnadzor 2024 yil yozida YouTube ishini sekinlashtirishni boshlaganda foydalangan. Idora Google server uskunalarini yangilamagani uchun kirish tezligi pasayganini aytgan. Google’ning o‘zi esa buni rad etgan.

Keyinroq Davlat dumasining sobiq deputati Aleksandr Xinshteyn (o‘sha paytda axborot siyosati qo‘mitasi rahbari) YouTube’ni sekinlashtirish Rossiya hokimiyati tashabbusi bilan amalga oshirilganini aytgan. Shundan so‘ng Roskomnadzor videoxostingni “qonunchilikni ko‘p marta buzish” va mamlakatga “hurmatsizlik”da ayblagan.

2025 yil dekabr oyida Davlat dumasi axborot siyosati qo‘mitasi raisi o‘rinbosari Andrey Svinsov YouTube Rossiyada yaqin 6–12 oy ichida to‘liq bloklanishi mumkinligini bildirgan.