HAMAS G‘azo sektoridagi bo‘limi rahbari halok bo‘lganini tasdiqladi

Yevropa Ittifoqi va AQShda terroristik tashkilot deb tan olingan HAMAS harakati vakillari tashkilotning G‘azo sektoridagi rahbari Muhammad Sinvar (2024 yil oktyabridan bu lavozimda bo‘lgan) hamda harbiy qanot matbuot kotibi Abu Ubaydaning halok bo‘lganini tasdiqladi. Bu haqda Reuters agentligi dushanba kuni, 29 dekabrda xabar berdi.

HAMAS ma’lumotiga ko‘ra, Sinvar — avvalroq yo‘q qilingan harakat rahbari Yahyo Sinvarning ukasi va Ubayda 2025 yil boshida G‘azodagi urush davomida halok bo‘lgan. Isroil tomoni Muhammad Sinvarning may oyida o‘ldirilganini aytgan, Ubaydaning o‘limi haqida esa avgust oxirida xabar berilgan.

May oyida ommaviy axborot vositalari Muhammad Sinvarning jasadi G‘azo sektori janubidagi Xon-Yunusdagi tonneldan topilgani haqida yozgan. O‘shanda u bilan birga uning o‘n nafar yordamchisining jasadlari ham topilgani aytilgan. Shuningdek, “Rafah” brigadasi qo‘mondoni Muhammad Shabana ham halok bo‘lgani haqida xabar qilingan. U paytda HAMAS bu xabarlarga izoh bermagan.

Isroil mudofaa vaziri Israel Kats o‘shanda Sinvar “barcha alomatlarga ko‘ra” Isroil zarbasi natijasida o‘ldirilganini aytgan. Biroq u bu ma’lumot rasman tasdiqlanmaganini ham qo‘shimcha qilgan.

Yaqin Sharqdagi vaziyat 2023 yil 7 oktyabrda keskinlashgan. YeI va AQShda terroristik deb tan olingan HAMAS harakati Isroilga keng ko‘lamli hujum uyushtirgan. Jangchilar Isroilga ommaviy raketa zarbalarini bergan, uning hududiga bostirib kirgan va taxminan 1200 kishini o‘ldirgan. Shuningdek, jangchilar 250 nafardan ortiq garovga olinganlarni asirga olib, G‘azo sektoriga olib ketgan. Garovdagilarning bir qismi almashuv yoki ozod qilish orqali qaytarilgan, bir qismi halok bo‘lgan.

Bunga javoban Isroil HAMASga qarshi urush e’lon qilgan. Quruqlikdagi operatsiya va G‘azo sektorining bombardimon qilinishi oqibatida 70 mingdan ortiq falastinlik halok bo‘lgan, yana 169 mingdan ziyodi yaralangan.

G‘azo sektorida o‘t ochishni to‘xtatish bo‘yicha kelishuvga Misrda 13 oktyabr kuni erishilgan. Isroil va HAMAS o‘rtasidagi kelishuvlar ijrosiga AQSh, Turkiya, Qatar va Misr kafil bo‘lgan.