FBK Putinning yana bir “saroyi”ni topdi - qo‘shib olingan Qrimda

Aleksey Navalniy tomonidan tashkil etilgan Korrupsiyaga qarshi kurash jamg‘armasi (FBK) seshanba, 30 dekabr kuni YouTube’da yangi surishtiruvini chiqardi. Unda Rossiya prezidenti Vladimir Putin qo‘shib olingan Qrimda saroyga ega ekani haqida da’vo qilingan.

Gap Balaklava yaqinidagi Ayya burunida joylashgan binolar majmuasi haqida ketmoqda. “Boshida bu ‘Ayya buruni’ pansionati binosi edi. Keyin bu joy Viktor Yanukovich (Ukrainaning sobiq prezidenti — tah.)ga yoqib qoldi: u yerdagi hamma narsani buzdirdi, daraxtlarni kesdirdi va o‘zi uchun yozgi dacha qurishni boshladi. Putin 2014 yilda Qrimni qo‘shib olganidan keyin Yanukovichning mulki tortib olindi va davlat mulkiga o‘tkazildi”, — deb hikoya qiladi Navalniyning safdoshlari.

FBKning davom etishicha, hozir bu joyda maydoni 9000 kvadrat metrdan ortiq bo‘lgan asosiy uy va maydoni qariyb 5000 kvadrat metr bo‘lgan mehmon qabul qilish uyi joylashgan. Jamg‘arma xabariga ko‘ra, ichida “saroyona intererlar” mavjud. Rezidensiyada xususiy tibbiy markaz va kriokamera ishlaydi. Bundan tashqari, hududda xodimlar uchun binolar, texnik inshootlar, vertolyot qo‘nish maydoni, o‘z sohilbo‘yi, pirs va oq qumli sun’iy plyaj ham bor.

Navalniyning safdoshlari ma’lumotlariga ko‘ra, Putinning ehtimoliy saroyini qurish taxminan 10 mlrd rublga tushgan. “Asosiy pudratchi sifatida ‘Kredo’ boshqaruv kompaniyasi qatnashgan. Bu kompaniya ilgari Putinning rasmiy va norasmiy rezidensiyalarini — Gelenjikda, Valdayda va Krasnaya Polyanada qurish hamda ularga xizmat ko‘rsatish bilan shug‘ullangan”, — deb qayd etadi FBK. Hujjatlarga ko‘ra, obekt firmalar zanjiri orqali rasmiylashtirilgan. Shu bilan birga, ishonchnomalarda Gelenjikdagi “Putin saroyi”ga oid hujjatlarda ham uchraydigan o‘sha advokatlar (yuristlar) ko‘rinadi. Interer bo‘yicha texnik topshiriqda esa Federal qo‘riqlash xizmati talablari to‘g‘ridan to‘g‘ri ko‘rsatilgan.

Korrupsiyaga qarshi kurash jamg‘armasi so‘nggi bir necha yil ichida bir qator shov-shuvli surishtiruvlarni e’lon qilgan. Masalan, 2021 yilda Navalniyning safdoshlari Qora dengiz sohilida qiymati 100 mlrd rubl deb baholangan “Putin saroyi”ni topganini aytgan. FBK ma’lumotiga ko‘ra, uni qurish va saqlash xarajatlarini ikki davlat kompaniyasi — “Rosneft” va “Transneft” to‘lagan.

2023 yilda Navalniy jamoasi Sochidagi nufuzli ko‘chmas mulk haqida yangi surishtiruv chiqargan: ularning da’vosiga ko‘ra, bu mulklar Rossiya Xavfsizlik kengashi kotibi Nikolay Patrushevning yaqin qarindoshlariga, yuqori lavozimli general Sergey Surovikinga va jurnalist Vladimir Solovyovga yaqin shaxslarga tegishli.

Noyabr oyida Rossiya Oliy sudi Bosh prokuratura da’vosi bo‘yicha FBKni “terroristik tashkilot” deb e’lon qilgan. Halok bo‘lgan rossiyalik muxolifatchi safdoshlari shunday degan: “Biz ishlashda davom etamiz. Surishtiramiz, haqiqatni aytamiz, siyosiy mahbuslarga yordam beramiz — Rossiya erkin bo‘lishi uchun qo‘limizdan kelgan barcha ishni qilamiz”.