2025 yil yakunlari: 302 ming oila kambag‘allikdan chiqdi

Milliy statistika qo‘mitasi Jahon banki bilan hamkorlikda o‘tkazgan kuzatuv natijalariga ko‘ra, 2025 yil yakunlari bo‘yicha O‘zbekistonda kambag‘allik darajasi 5,8 foizni tashkil etdi. Bu 2024 yilga nisbatan 3,1 foiz punktga kam.

Foto: Kun.uz

Ma’lumotlarga ko‘ra, kambag‘allik darajasini hisoblash metodologiyasi Jahon banki tavsiyasi asosida 16 mingta uy xo‘jaligi budjetini o‘rganish orqali amalga oshirilgan.

Qayd etilishicha, kambag‘allik dinamikasida izchil pasayish kuzatilgan: 2023 yil — 14 foizdan 11 foizga, 2024 yil — 8,9 foiz, 2025 yil — 5,8 foiz. Natijada 2025 yilda 302 ming oila kambag‘allik holatidan chiqarilgan. Kambag‘allik darajasining qisqarishi barcha hududlarda qayd etilgan.

Eng yuqori ijobiy natijalar qator hududlarda kuzatilgan: Jizzax (11,8 foiz → 5,8 foiz), Xorazm (11,9 foiz → 6,7 foiz), Sirdaryo (11,3 foiz → 6,2 foiz), Qoraqalpog‘iston (10,8 foiz → 6,6 foiz), Toshkent shahri (7,3 foiz → 3,5 foiz).

Shuningdek, kambag‘allik darajasi shaharlarda ko‘proq qisqarib, 5,2 foiz (2024 yilda — 8,6 foiz), qishloq hududlarida esa 6,4 foiz (2024 yilda — 9,2 foiz)ni tashkil etgan.

Hisob-kitoblarga ko‘ra, hozirgi kunda respublikada kambag‘al aholi soni 2,2 million nafar. Kambag‘allikning pasayishi bandlikni oshirish, tadbirkorlikni qo‘llab-quvvatlash va aholining iqtisodiy faolligini kengaytirishga qaratilgan islohotlar samarasi ekani bilan izohlanadi.

Tayyorlagan: Отабек Матназаров

#statistika #kambag‘allik