2026 yilning birinchi yarmida gaz qazib olish hajmi 18,3 mlrd kub metrni tashkil etib, 2025 yilning mos davriga nisbatan qariyb 3,6 mlrd kub metrga yoki 16,4 foizga, 2024 yilning mos davriga nisbatan esa 4,2 mlrd kub metrga yoki 18,6 foizga qisqargan. Bu haqda Milliy statistika qo‘mitasining sanoat ishlab chiqarishi bo‘yicha hisobotida keltirib o‘tilgan.

Iyun oyida gaz qazib olish hajmi 2,5 mlrd kub metrgacha kamaygan. Bu joriy yildagi eng minimal ko‘rsatkich. O‘z navbatida, qazib olish hajmi o‘tgan yilning mos davriga (3,4 mlrd kub) nisbatan qariyb 25 foizgacha qisqargan. Ma’sul idoralar bunga nima sabab bo‘lgani haqida tushuntirish bermagan.

2026 yilning birinchi yarmida oylar kesimida gaz qazib olish ko‘rsatkichlari:

  • Yanvar - 3,7 mlrd kub;
  • Fevral - 3,2 mlrd kub;
  • Mart - 2,7 mlrd kub;
  • Aprel - 3 mlrd kub;
  • May - 3,2 mlrd kub;
  • Iyun - 2,5 mlrd kub.

Har qanday mamlakat, shu jumladan O‘zbekiston uchun ham tabiiy gaz resurslari strategik ahamiyatga ega. Bu mamlakat iqtisodiyoti, energetik xavfsizligi va tashqi savdo balansiga juda katta ta’sir ko‘rsatadi. Oxirgi yillarda gaz qazib olish dinamikasi quyidagicha o‘zgardi:

So‘ngi prognozlarga ko‘ra, joriy yilda 40,2 mlrd kub metr gaz qazib olinishi kutilyapti. Keyingi 4 yil davomida gaz qazib olish ko‘rsatkichlari quyidagicha o‘zgarishi mumkin:

  • 2027 yil – 42,9 mlrd kub (+6,7 foiz);
  • 2028 yil – 44,5 mlrd kub (+3,7 foiz);
  • 2029 yil – 45,5 mlrd kub (+2,2 foiz);
  • 2030 yil – 48,5 mlrd kub (+6,6 foiz).

Qolgan energetika mahsulotlari bilan bog‘liq vaziyat qanday?

Hisobot davrida neft qazib olish 323,9 ming tonnadan 313,8 ming tonnaga (-3,1 foiz), gaz kondensati ishlab chiqarish 575,2 ming tonnadan 462,1 ming tonnaga (-19,6 foiz), ko‘mir qazib olish 3 mln tonnadan 2,5 mln tonnaga (-16,6 foiz) qisqargan.

Shuningdek, dizel yonilg‘isi ishlab chiqarish 556,4 ming tonnadan 568 ming tonnaga (+2,1 foiz), benzin ishlab chiqarish 579,7 ming tonnadan 614,2 ming tonnaga (+5,9 foiz) oshgan.

Elektr energiyasi ishlab chiqarish ham ko‘paygan. Xususan, 2025 yilning yanvar-iyun oylarida 41,7 mrld kWh elektr energiyasi ishlab chiqarilgan bo‘lsa, bu ko‘rsatkich joriy yilning mos davrida 44,1 mlrd kWhʼni tashkil etgan. Generatsiyaning oshishi asosan yangi quvvatlar hisobiga ro‘y beryapti.

O‘z navbatida, hisobot davrida O‘zbekistonda 235 ming 794 dona mashina ishlab chiqarilgan. Bu 2025 yilning birinchi yarmiga nisbatan 26 ming 819 donaga ko‘p.