Avtosalonlar va servisdagi muammolar bo‘yicha murojaatlar: natijalar e’lon qilindi

Raqobat qo‘mitasi va uning hududiy boshqarmalariga fuqarolardan avtomobillar xaridi, yetkazib berilishi va kafolatli servis xizmatlariga doir kelib tushgan murojaatlar ko‘rib chiqilib, qator holatlarda iste’molchilar manfaati himoya qilinmoqda.

Buxoro viloyatida yoqilg‘i sifati bilan bog‘liq holat o‘rganilib, fuqaroning “Narzulloobod Javohiri” XK yonilg‘i quyish shoxobchasidan olgan 10 litr AI-95 benzini sabab avtomobilida nosozlik kelib chiqqanligi ma’lum bo‘ldi. Servis xulosasi asosida korxonaga nisbatan ish qo‘zg‘atilib, iste’molchining 14,4 mln so‘mga yaqin zarari qoplanishi ta’minlandi.

Jizzax viloyatida Samarqand viloyati fuqarosining Jizzax Avto Savdo MChJdan xarid qilingan Chevrolet Tracker Premier Plus avtomobili motorida nuqson aniqlangani bo‘yicha murojaati ko‘rib chiqildi. Natijada avtosalon tomonidan nuqsonli avtomobil o‘rniga xuddi shu narxdagi yangi avtomobil taqdim etilishi ta’minlandi.

Qashqadaryo viloyatida G‘uzor tumani fuqarosi Favorite-Cars-Service MChJga 27.01.2025 kuni to‘lov qilganiga qaramay, Cobalt avtomobili belgilangan muddatda yetkazilmagani yuzasidan murojaat qilgan. O‘rganishlar natijasida 10 oy kutilgan avtomobil fuqaroga yetkazib berilishi ta’minlandi.

Navoiy viloyatida BILLUR AVTO SAVDO NAVOIY MChJdan xarid qilingan ONIX avtomobilining old eshik qoplamasida nuqsonlar borligi va akkumulyatori nosozligi haqidagi murojaat o‘rganildi. Natijada nuqsonlar bartaraf etildi va akkumulyator yangisiga almashtirilishi ta’minlandi.

Samarqand viloyatida 2025 yil 3 noyabrda Cobalt avtomobili uchun to‘liq to‘lov qilingani, biroq avtomobil o‘z vaqtida yetkazilmagani aniqlandi. Natijada avtosalon tomonidan Cobalt avtomashinasi qisqa muddatda fuqaroga topshirilishi ta’minlandi.

Surxondaryo viloyatida Termizlik fuqaroning 173 mln so‘mlik Chery avtomobilida qisqa muddatda nosozlik yuzaga kelgani va ta’mirlanmayotgani haqidagi murojaati ko‘rib chiqildi. Natijada avtomobil avtosalon tomonidan to‘liq ta’mirlab berildi.

Toshkent viloyatida kafolatdagi KIA Sonet avtomashinasida texnik nosozlik aniqlanib, ta’mirlash uchun 840 ming so‘m talab qilingani yuzasidan murojaat o‘rganildi. Natijada Qibray Avto Markaz MChJ tomonidan avtomashina moyi va filtri bepul yangisiga almashtirib berilishi ta’minlandi.

Toshkent shahrida Chinoz tumanida yashovchi fuqaroning TOSHKENT DEU MChJdan xarid qilgan Damas-2 D2 Style Plus avtomobilida nuqsonlar borligi va sifatlisiga almashtirishda muammolar yuzaga kelgani haqidagi murojaati o‘rganildi. Natijada nuqsonli avtomobil fuqaroga xuddi shu rusumdagi yangisiga almashtirib berilishi ta’minlandi.