Buxorodagi yangi aeroport 2027 yilning birinchi choragida ishga tushirilishi rejalashtirilyapti

Yangi Buxoro xalqaro aeroporti 2027 yil birinchi choragida ishga tushirilishi mumkin. Bu haqda Buxoro xalqaro aeroporti direktori o‘rinbosari Shahboz Hayitov «O‘zbekiston 24» telekanaliga bergan intervyusida ma’lum qildi.

«Aeroportimizda 550 nafar xodim ishlaydi. 2026 yilgi reja bo‘yicha aviaqatnovlarni 15 foizga ko‘paytirish, 2026−2027 yillarda yangi aeroport qurib, ishga tushirish maqsadi qo‘yilgan. Uni ishga tushirish 2027 yil birinchi choragida rejalashtirilyapti. Aeroport soatiga 2000 yo‘lovchiga xizmat ko‘rsatadi», dedi Hayitov.

Buxoro viloyati hokimi o‘rinbosari Jalol Arashovning ta’kidlashicha, aeroport bir vaqtning o‘zida soatiga 16 tagacha havo kemasini qabul qilish, haftasiga 100 dan ortiq reyslarni amalga oshirish imkoniyatiga ega bo‘ladi.

«Hozirgi aeroport soatiga 400 ta yo‘lovchiga xizmat ko‘rsata oladi, yangi zamonaviy xalqaro aeroportda esa bu ko‘rsatkich soatiga 1200 ta yo‘lovchiga ko‘payadi Bu degani uch barobarga salohiyat oshyapti. Havo kemalari to‘xtash joylari ham hozirgi xalqaro aeroportda 7 ta bo‘ladigan bo‘lsa, yangi aeroportda 20 ta bo‘ladi», dedi Arashov.

Ma’lumot uchun, Buxoro tumanida yangi xalqaro aeroport qurish loyihasi 2024 yilning may oyida taqdim etilgandi. O‘sha paytda loyiha qiymati 226 million dollarga baholanib, DXSh asosida amalga oshirilishi ma’lum qilingandi.