«Barcha dron operatorlari jangovar vazifani bajarishga tayyor» – O‘zbekiston mudofaa vaziri

13 yanvar kuni O‘zbekiston prezidenti, qurolli kuchlar oliy bosh qo‘mondoni Shavkat Mirziyoyev raisligida Xavfsizlik kengashining kengaytirilgan yig‘ilishi bo‘lib o‘tdi. Yig‘ilishda O‘zbekiston xavfsizligini ta’minlash, mudofaa qobiliyatini mustahkamlash borasidagi ustuvor vazifalar muhokama qilindi.

Yig‘ilishda O‘zbekiston mudofaa vaziri, general -leytenant Shuhrat Xolmuhamedovning hisoboti ham tinglandi. Mudofaa vaziri barcha poligonlarda yerosti pozitsiyalari, dronlarni boshqarish o‘quv obektlari qurilganini ma’lum qilgan.

«Barcha poligonlarda yerosti pozitsiyalari, dronlarni boshqarish o‘quv obektlari, Chirchiq, Angren va maxsus operatsiya kuchlari poligonida skalodrom va motodromlar, Sariosiyo va Nuriston poligonida jangovar liniyalar yangidan barpo etildi.

Uchuvchisiz komplekslar mutaxassislarini tayyorlash markazi tashkil etilib, 340 nafar mutaxassis o‘qitildi va sinovdan o‘tkazildi. Aytishim joizki, askarlarimiz qisqa muddatda eng qiyin bo‘lgan FPV-dronlarni boshqarish, nishonlarga aniq zarba berish ko‘nikmalarini to‘liq o‘zlashtirishdi. Bugungi kunda barcha FPV-dron operatorlari jangovar vazifani bajarishga tayyor», – deydi mudofaa vaziri.

Vazirning ta’kidlashicha, havo hujumidan mudofaa bo‘linmalari yangi olingan zenit komplekslarini muvaffaqiyatli sinovdan o‘tkazgan.

«Kulquduq poligonida havo hujumidan mudofaa bo‘linmalari mamlakat havo sarhadlarini himoya qilish bo‘yicha siz olib bergan KS-1, FD-2000, Pechora, QV-18, FM-90 zenit komplekslaridan birinchi marta tunda va qiyin ob-havo sharoitida «bir nishon – bir raketa» tamoyilida jangovar otishlar o‘tkazilib, eshelonlashtirilgan havo hujumidan mudofaa tizimini yaratishga erishildi.

Kattaqo‘rg‘on poligonida ilk marta modernizatsiya qilingan Su-25 samolyotidan 4000 metr balandlikda boshqariladigan Lizard-3 va FAB-250 aviabombalari bilan shartli dushmanning qo‘mondonlik punkti va zirhli texnikalar kolonasi yakson etildi», – deydi vazir.

Shuningdek armiyada sun’iy intellekt va robotlashtirilgan majmualarni yaratish, kiberxavfsizlikni ta’minlash yuzasidan berilgan barcha topshiriqlar sifatli bajarilayotgani aytildi.

Hisobot davrida O‘zbekistondagi harbiy zavodlarda 7000 dan ortiq qurol-aslaha, 452 ta jangovar texnika ta’mirlangan. 110 mingdan ortiq butlovchi qismlar va 14 ta yangi trenajyor ishlab chiqarilgan. Zavodlarning 760 nafar mutaxassislari maxsus kurslarda o‘qitilgan.

Zirhli texnikalarni ta’mirlash zavodida yillar davomida zaxira fondida bo‘lgan 20 ta BTR-80 modernizatsiya qilingan. «Quyoshlik»dagi zavod mutaxassislari tomonidan 53 ta BM-19, 2000 ga yaqin qurol hamda 1000 dan ortiq optik moslamalar modernizatsiya qilingan. Modernizatsiya ishlari natijasida 2025 yilda jami 850 milliard so‘m budjyet mablag‘lari iqtisod qilinishiga erishilgan.

Shuningdek, mudofaa vaziri joriy yildan bosqichma-bosqich barcha harbiy okruglarda mafkuraviy va raqamli poligonlarni barpo etishni taklif qildi.