O‘zbekistonda aholi va qishloq xo‘jaligini ro‘yxatga olish boshlandi

Fuqarolar census.stat.uz platformasi orqali 31 yanvargacha onlayn tarzda ro‘yxatdan o‘tishi mumkin. 4–28 fevral kunlari maxsus tayyorgarlikdan o‘tgan xodimlar uyma-uy yurib, aholini va qishloq xo‘jaligiga doir ma’lumotlarni ro‘yxatga oladi.

O‘zbekistonda 15 yanvardan aholi va qishloq xo‘jaligini ro‘yxatga olish boshlandi. Jarayon 28 fevralga qadar davom etadi.

Adliya vazirligi xabariga ko‘ra, davlat organlari va tashkilotlari 2026 yil 15 yanvardan 31 yanvargacha o‘z tizimida faoliyat yuritayotgan barcha xodimlarning census.stat.uz portalida ro‘yxatdan o‘tishini ta’minlashi lozim. Ro‘yxatdan o‘tish OneID tizimi orqali amalga oshiriladi.

Rasmiy ma’lumotlarga ko‘ra, ro‘yxatga olish quyidagi tartibda amalga oshiriladi:

- 15–31 yanvar — fuqarolar census.stat.uz platforma orqali onlayn tarzda ro‘yxatdan o‘tadi;

- 4–28 fevral — maxsus tayyorgarlikdan o‘tgan xodimlar uyma-uy yurib, aholini va qishloq xo‘jaligiga doir ma’lumotlarni ro‘yxatga oladi.

Tadbir doirasida aholining yoshi, ta’lim darajasi, bandlik holati, migratsiya jarayonlari, shuningdek, qishloq xo‘jaligida yerdan foydalanish va chorvachilik ko‘rsatkichlari bo‘yicha aniq ma’lumotlar to‘planadi.

Mutasaddilar ta’kidlashicha, barcha to‘plangan ma’lumotlar maxfiy saqlanadi va faqat statistik maqsadlarda qo‘llanadi. Ro‘yxat savolnomasi 71 ta savoldan iborat bo‘lib, unda aholining turmush tarzi va qishloq xo‘jaligiga oid asosiy ko‘rsatkichlar qamrab olingan.

Qayd qilish joiz, ahlini ro‘yxatga olish mustaqil O‘zbekiston tarixida birinchi marta o‘tkazilmoqda.