Ukraina Bosh prokuraturasi Leonid Volkovga nisbatan ish ochdi

Rossiyaning Sota nashri avvalroq xabar berishicha, muxolifatchiga nisbatan ish Rossiyaning qurolli tajovuzini “oqlash” moddasi bilan (Ukraina Jinoyat kodeksi 436-2-moddasi 3-qismi) qo‘zg‘atilgan. Nashr, da’vo qilinishicha, “Ukraina Bosh prokurorligi ofisining arizachilardan biriga javobi” skrinshotini e’lon qildi. Hujjat 13 yanvar sanasi bilan rasmiylashtirilgan, biroq unda Volkovning ismi tilga olinmaydi.

Rossiyalik muxolifatchiga nisbatan jinoyat ishi qo‘zg‘atilgani haqida Ukrainadagi “Glavkom” nashri ham Sudgacha tergovlar yagona reyestri ma’lumotlariga tayanib xabar bergan. U yerda ish harbiylarning sha’ni va qadr-qimmatini haqorat qilish moddasi bilan ham (Ukraina Jinoyat kodeksi 435-1-moddasi) ochilgani aytilgan. Qaror “Xalq xizmatkori” partiyasidan Oliy Rada deputati Olga Vasilevskaya-Smaglyuk murojaatidan so‘ng qabul qilingani qayd etilgan.

Ish qo‘zg‘atilishiga sabab 5 yanvar kuni KQJning sobiq xodimi Anna Tiron tomonidan e’lon qilingan ma’lumot bo‘lgan. U hozir Ukraina tomonida jang qilayotgan “Rus ko‘ngillilar korpusi” (RKK)da ishlaydi. Tiron Facebook’da Leonid Volkov unga avvalroq yuborgan shaxsiy xabarni joylashtirgan: bu xabar RKK asoschisi, o‘ta o‘ng qarashlarga ega Denis Kapustinning o‘limi haqidagi xabardan keyin yo‘llangan bo‘lib, o‘sha paytda uning “o‘limi sahnalashtirilgani” hali ma’lum emas edi.

Bu xabarda muxolifatchi, jumladan, Kapustinning o‘limini ma’qullagan, RKKni “soxta ‘korpus’” deb atagan va u “qishloqcha, pastkash siyosiy texnolog (ilgari — Ukraina razvedkasi rahbari, hozir — Ukraina prezidenti ofisi rahbari) Budanovning shubhali ishlarni hal qilganini” yozgan. Volkov, shuningdek: “Umid qilaman, Kapustindan keyin uning sheriklari ham ketadi. Yermak qamaladi, Podolyak qamaladi, Budanov qamaladi va boshqa barcha propagandachi, ikkiyuzlamachi o‘g‘ri-talonchilar ham”, — deb yozgan.

Keyinroq muxolifatchi o‘z matnini “hissiyotga berilgan va keskin” deb atagan hamda uni “yozmaslik kerak edi” degan. Shu bilan birga, u “neonatsistlarga yomon qarashi”ni ta’kidlagan. Hozir Litvada yashayotgan Volkovning so‘zlarini tekshirish bilan, migratsiya xizmati murojaatidan keyin, ushbu mamlakat Davlat xavfsizligi departamenti shug‘ullanmoqda. Hokimiyat uning bayonotlari Litva xavfsizligiga tahdid soladimi-yo‘qmi — shuni aniqlamoqchi.