“Dunyo” AA xabar berishicha, O‘zbekiston Investitsiyalar, sanoat va savdo vazirligi (ISSV) ma’lumotlariga ko‘ra, amaliy tashrif davomida ikki mamlakat o‘rtasida qator muhim uchrashuvlar o‘tkazildi.
Tashrifning birinchi kuni Pokiston bosh vazirining sanoat masalalari bo‘yicha maxsus yordamchisi Harun Axtar Xon bilan tor doirada uchrashuv bo‘lib o‘tdi. Shuningdek, Pokiston Sanoat va ishlab chiqarish vazirligi binosida qariyb 10 ta tegishli vazirlik va idoralar vakillari ishtirokida kengaytirilgan yig‘ilish tashkil etildi.
Tashrif davomida charm sanoati bo‘yicha tarmoq uyushmalari rahbarlari, shuningdek farmatsevtika va sanoat sohasidagi yetakchi kompaniyalar rahbariyati bilan ham muzokaralar olib borildi.
Shuningdek, Pokiston Milliy logistika kompaniyasi (NLC) bosh direktori Shog‘ayb Ahmad Xon bilan uchrashuvda xalqaro yuk tashuvlarini rivojlantirish, shuningdek Xunjyerob dovoni orqali Pokiston – Xitoy – Qirg‘iziston – O‘zbekiston transport yo‘nalishi bo‘yicha hamkorlikni kengaytirish masalalari muhokama qilindi.
Tashrifning ikkinchi kuni O‘zbekiston delegatsiyasi Karachi portiga tashrif buyurib, port infratuzilmasidan tranzit yo‘nalishlarini kengaytirish, shuningdek O‘zbekiston mahsulotlarini tashqi bozorlarga chiqarishda foydalanish imkoniyatlarini ko‘rib chiqdi.
Uchrashuvlar yakunida tomonlar maslahatlashuvlarni davom ettirish va qo‘shma tashabbuslarni amaliy jihatdan chuqur ishlab chiqishga kelishib olgan.
