Robot texnologiyalari zamonaviy tibbiyotning kelajagi ekani ta’kidlanib, prezident o‘tgan yili soha xodimlari bilan uchrashuvda ixtisoslashtirilgan tibbiyot markazlari oldiga ilg‘or raqamli yechimlarni amaliyotga keng tatbiq etish vazifasini qo‘ygan edi.
Ma’lum qilinishicha, V.Vohidov nomidagi markaz mazkur topshiriq ijrosi doirasida birinchilardan bo‘lib robot-assistentli xirurgik tizimni ishga tushirgan. Bu esa O‘zbekiston sog‘liqni saqlash tizimi tarixida muhim voqea sifatida qayd etilmoqda. Shu tariqa markaz ushbu texnologiyani amaliyotga joriy etgan navbatdagi davlat davolash muassasasiga aylangan.
Bugun ushbu voqeaga bag‘ishlangan tadbir bo‘lib o‘tdi. Unda sog‘liqni saqlash vazirining birinchi o‘rinbosari A.Boboyev ishtirok etdi. Shuningdek, taqdimotda barcha viloyat ko‘p tarmoqli shifoxonalarining xirurgiya bo‘limlari xodimlari video-konferens-aloqa orqali qatnashdi.
