Elektr tarmog‘iga o‘zboshimchalik bilan ulangan mayning qurilmalari topildi

Andijon viloyatida noqonuniy “mayning ferma” tashkil etib, umumiy foydalanishdagi elektr tarmog‘idan 438,7 mln so‘mlik elektr energiyasidan qonunga xilof foydalangan shaxslar aniqlandi. Holat yuzasidan jinoyat ishi qo‘zg‘atilib, tergov olib borilmoqda.

Foto: Bosh prokuratura huzuridagi departament

Bosh prokuratura huzuridagi Departamentning Andijon viloyati boshqarmasi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda fuqaro F.S. va boshqalar o‘zaro til biriktirib, tijorat maqsadida Andijon shahri “Pistamozor” MFY hududidagi xonadonida yashirin ravishda mayning kripto-aktivlari qurilmalarini o‘rnatgani aniqlangan.

Ma’lum qilinishicha, ular 5 ta to‘plamdagi mayning qurilmasini umumiy foydalanishdagi elektr tarmog‘iga o‘zboshimchalik bilan ulab, jami 438,7 mln so‘mlik elektr energiyasidan noqonuniy foydalangan.

Mazkur holat yuzasidan Jinoyat kodeksining 169-moddasi (o‘g‘rilik) va 278-9-moddasi (mayning faoliyatini qonunga xilof ravishda amalga oshirish) bilan jinoyat ishi qo‘zg‘atilib, hozirda tergov harakatlari olib borilmoqda.

Tayyorlagan: Отабек Матназаров

#Andijon viloyati #mayning