2025 yilda voyaga yetmaganlar tomonidan 15 ta qotillik jinoyati sodir etildi

2025 yilda O‘zbekistonda qotillik jinoyatlarining 15 tasi voyaga yetmaganlar tomonidan sodir etilgani ma’lum bo‘ldi. Bu haqda Kriminologiya tadqiqot instituti xabar berdi.

Ma’lum qilinishicha, o‘tgan yilda respublikada voyaga yetmaganlar 3 266 ta jinoyatga qo‘l urgan. Bu jami jinoyatlarning 2,1 foizini tashkil etgan. Shundan 2 554 tasi oldini olish mumkin bo‘lgan, 321 tasi aniqlangan, 391 tasi axborot texnologiyalari yordamida sodir etilgan jinoyatlar.

Voyaga yetmaganlar tomonidan sodir etilgan jinoyatlarning 65,5 foizi 5 ta hudud hissasiga to‘g‘ri kelgan: Toshkent shahrida 634 ta, Farg‘onada 482 ta, Namanganda 371 ta, Toshkent viloyatida 345 ta va Samarqandda 308 ta.

Oldini olish mumkin bo‘lgan jinoyatlarning har ikkinchisi (1 313 ta) o‘g‘rilik ekani aniqlangan. Shuningdek, voyaga yetmaganlar tomonidan 84 ta firibgarlik, 193 ta bezorilik, 68 ta og‘ir tan jarohati yetkazish, 68 ta transport vositasini olib qochish, 36 ta nomusga tegish, 17 ta bosqinchilik hamda 15 ta qotillik jinoyatlari sodir etilgan.