Xitoyda nufuzli generallarga qarshi tergov boshlandi

Xitoyning Xalq-ozodlik armiyasi (XXOA)da keng ko‘lamli korrupsiya mojarosi avj oldi. Uning markazida Markaziy harbiy kengash (MHK) raisi o‘rinbosari Chjan Yusya va MHK qo‘shma shtabi boshlig‘i general Lyu Chjenli turibdi. Agar Chjan lavozimidan chetlatilsa, bu 1989 yilda Tyananmen maydonidagi namoyishlar bostirilganidan keyingi davrdan beri Xitoy armiyasidagi eng yirik kadrlar almashinuvlaridan biri bo‘ladi, deb yozadi The Washington Post yakshanba, 25 yanvar kuni.

Bundan tashqari, Xitoydagi eng yuqori lavozimli harbiy amaldor hisoblangan Chjanning vazifadan chetlatilishi XXR raisi Si Jinping qo‘lida harbiy hokimiyatning misli ko‘rilmagan darajada jamlanishini anglatadi, deya qayd etadi nashr.

Financial Times gazetasi ham armiyadagi korrupsiyaga qarshi tergovlar natijasida qurolli kuchlarga rahbarlik qiluvchi Markaziy harbiy kengashda atigi ikki kishi qolganini, ulardan biri Xitoy rahbari ekanini ta’kidlaydi. Jurnalistlar bu holat MHK uchun misli ko‘rilmagan vaziyat ekanini ko‘rsatadi.

Bundan bir kun oldin Pekindagi Milliy mudofaa vazirligi Chjan Yusya va Lyu Chjenliga nisbatan “intizom va qonunning jiddiy buzilishi” bo‘yicha tergov boshlanganini ma’lum qildi. AFP qayd etishicha, Xitoyda bu atama ko‘pincha korrupsiyani anglatish uchun ishlatiladi.

75 yoshli Chjan Yusya — mamlakatdagi eng yuqori lavozimli general va hukmron Xitoy Kommunistik partiyasi siyosiy byurosining 24 a’zosidan biri. U MHK raisi o‘rinbosari lavozimini o‘z qo‘li ostidagi harbiy — Xitoy raketa qo‘shinlari generali va familiyasi bir xil bo‘lgan Chjan Shenmin bilan birgalikda egallab turadi.

2012 yildan beri MHKni boshqarib kelayotgan Si Jinping korrupsiyani Xitoy uchun “eng katta tahdid” deb ataydi. 2013 yilda XXR raisi lavozimiga kirishganidan so‘ng, Si harbiy va davlat boshqaruvining barcha darajalardagi ehtimoliy korrupsiyasiga qarshi kurashni kuchaytirgan. Tanqidchilar esa u korrupsiyaga qarshi kampaniyani keraksiz raqiblarni bartaraf etish uchun ishlatyapti, deb hisoblaydi.

Oktyabr oyida Xitoy hukumati armiyaning to‘qqiz nafar vakiliga nisbatan korrupsiya gumoni bilan tergovlar boshlanganini e’lon qilgan. Ikki nafar yuqori martabali general lavozimidan olingan, ular orasida Chjan Shenminning o‘tmishdoshi bo‘lgan Xe Veydun ham bor.