Deripaska Telegram'dan urushga oid postlarni o‘chirib tashladi

Rossiyadagi eng yirik metallurgiya xoldingi “Rusal”ning sobiq rahbari Oleg Deripaska Telegram ijtimoiy tarmog‘ida Ukrainadagi urush va Rossiya hokimiyatini tanqid qilgan postlarini o‘chirib tashladi. “Vajnyye istorii” nashri 26 yanvar, dushanba kuni xabar berishicha, uning kanalida 2025 yil 1 noyabrgacha e’lon qilingan urushga qarshi bayonotlar yo‘qolgan.

Jumladan, Deripaska Ukrainaga keng ko‘lamli hujumni “telbalik” deb atab, uni “hozirning o‘zida tugatish kerak” degan post ham o‘chirilgan. Shuningdek, u qo‘shimcha eksport bojlarini “pul siqib olish/ekspropriatsiya” deb baholagan nashrini ham olib tashlagan. Bundan tashqari, u soliqlarni oshirmaslik uchun Mudofaa vazirligi va boshqa kuch tuzilmalari shtatlarini chorakka qisqartirishga chaqirgan postni ham o‘chirgan — unda “bu to‘dani boqish” uchun soliqni ko‘tarishga qarshi fikr bildirilgan.

Nashr qayd etishicha, Deripaska keyinroq yozgan ba’zi postlarini tahrirlagan ham. Xususan, 12 yanvar kungi postda u hokimiyat harakatlari sabab “minglab” Rossiya korxonalari bankrot bo‘lish xavfi ostida qolishini aytgan. “Qandaydir me’yordan tashqari darajada sodda eksperiment ketyapti, u sharmandali tarzda yakunlanadi”, — deb yozgan u. Keyinroq ushbu postda faqat inflatsiyaga qarshi kurashda hokimiyat va biznes harakatlarini muvofiqlashtirishga chaqiriq qolgan.

Prezident Vladimir Putinga yaqin shaxs hisoblanadigan oligarx Oleg Deripaskaga AQSh 2018 yildan beri sanksiya qo‘ygan. RFning Ukrainaga keng ko‘lamli hujumi boshlanganidan keyin esa u YeI, Buyuk Britaniya va boshqa davlatlarning sanksiya ro‘yxatlariga kiritilgan.

Deripaska shaxsiy sanksiyalarni bekor qildirishga urinib, bir necha bor rezonans bayonotlar bergan, ammo Putinni biror marta tilga olmagan. Britaniyaning Financial Times gazetasi ma’lumotiga ko‘ra, Kreml kamida ikki marta undan urushni tanqid qilishni to‘xtatishni talab qilgan.

Ukraina Xavfsizlik xizmati (UXX) Deripaskaga Ukraina Jinoyat kodeksining bir nechta moddalari bo‘yicha, jumladan urushni moliyalashtirish uchun ham, sirtdan gumon e’lon qilgan. Ukrainada uning barcha zavodlari milliylashtirilgan va 48 mln yevro miqdoridagi aktivlari xatlovga olingan.