Gaz berilmayotgani sababli metan-shoxobchalarda uzundan-uzun navbatlar saqlanib qolyapti

O‘tgan haftada Energetika vazirligi metan «zapravkalar» ishiga vaqtincha cheklov joriy etilganini ma’lum qilgandi. Bu havo harorati pasayishi va tabiiy gazga talab oshishi ortidan ayrim hududlardagi quvurlarda bosim pasaygani bilan izohlangandi. Kun.uz’ga vodiy viloyatlaridan qator murojaatlar kelyapti. Ta’kidlanishicha, «zapravkalar» ishlashi kerak bo‘lgan vaqt oralig‘ida ham ochilmayapti.

«Metanda yuraman, tirikchilik mashinaga bog‘liq. Benzin qimmatlik qilyapti. «Zapravkalar» qachon ochilishi mumkinligi haqida aniq ma’lumot yo‘q, vaqtimni behudaga kutish bilan sarflab yuboryapman. Ishlarimni ham rejalashtira olmayman, shu bo‘yicha tizimli ishlashsa yaxshi bo‘lardi», deydi murojaatchilardan biri.

Vaziyat ayniqsa Farg‘onada jiddiylashgan. Ushbu viloyatda 25-26 yanvar kunlari gaz «zapravkalar» yopiqligi va jamoat transporti metan quya olmagani uchun avtobuslar ishlay olmagan. Bu respublika magistral tarmog‘ida gaz tanqisligi mavjudligi bilan izohlandi.

Energetika vazirligi axborot xizmati ma’lumotlariga ko‘ra, maxsus texnikalar va jamoat transportlari uchun 25 yanvar kuni 1,5 mln kub metr, 26 yanvar kuni esa 2,5 mln kub metr gaz yetkazib berilgan.

«Farg‘ona viloyatida soat 12:00 dan 15:00 gacha bo‘lgan vaqt oralig‘ida jamoat transporti va kommunal xizmat transporti uchun 22 ta, Toshkent viloyatida 14:30 dan 17:30 gacha 20 ta metan gaz quyish shoxobchasi orqali xizmat ko‘rsatildi. Qolgan hududlarda ham bu yo‘nalishda ishlar davom ettirilyapti», deyiladi vazirlik xabarida.

Iqtisodchi Otabek Bakirov «zapravka»larga yetkazib berilayotgan gaz miqdori juda ham kamligiga ishora qilib, tizimni tanqid ostiga oldi.

«Energovazirlikning 25 yanvar kuniga oid axborotiga nisbatan yig‘lashniyam, kulishniyam bilmaysan. Vodiyda 417 ta «zapravka» faoliyat ko‘rsatganini iddao qilgan energetiklarga ko‘ra, shu «zapravka»larga 81,8 ming kub gaz berilgan. Ya’ni bitta «zapravka»ga o‘rtacha 196 kub gaz tarqatilgan. Ma’lumot uchun, bitta 12 metrli avtobusni to‘ldirishga kamida 200-250 kub gaz kerak bo‘ladi», deya yozdi iqtisodchi.

Kun.uz bilan bog‘langan murojaatchilarga ko‘ra, Toshkent shahrida ham aksariyat metan «zapravka»lar ishlamayapti.

Va’da qilingan gaz konteynerlari qani?

2025 yil 11 dekabr kuni energetika vaziri Jo‘rabek Mirzamahmudov Oliy Majlis Qonunchilik palatasida energetika tizimida amalga oshirilgan ishlar yuzasidan hisobot bergandi. Unda vazir 2025-2026 yilgi qish mavsumida vodiy viloyatlaridagi gaz quyish stansiyalarida yuzaga kelishi mumkin bo‘lgan taqchillikni bartaraf etish maqsadida 2 xil yechim ishlab chiqilganini ma’lum qilgandi:

«Yangi tashabbus tashkil qilindi. Bu bosim past bo‘ladigan Farg‘ona vodiysidagi avtomobillarga gaz quyish stansiyalariga (AGQS) ko‘proq ta’sir qilishi inobatga olinadi. Ikkita yo‘nalishda ish tashkil qildik. Birinchisi, qo‘shni davlatdagi mavjud tranzit quvurlardan foydalangan holda yaqinroq masofadan ta’minotni amalga oshirish. Xovos–Farg‘ona liniyasidan foydalanilyapti. Ikkinchisi, 150 ta ko‘chma gaz quyish shoxobchalarini olib keldik. 22 dekabrgacha Beshariqdagi gaz quyish shoxobchasi to‘liq ishga tushadi, hozir texnologik uskunalar, treylerlar va konteynerlar olib kelinyapti. Bu gaz «zapravka» o‘chgan paytda ko‘chma shoxobchalarni to‘ldirgan holda 5 mingdan 10 ming kub metrgacha gaz yetkazib berish imkonini beradi. Hozirgi kunda 14 ta AGQS bilan mazkur tizim sinab ko‘rildi. 22 dekabrdan keyin bu Farg‘ona vodiysida zaxira tizim sifatida joriy qilinadi», degandi Mirzamahmudov.

2026 yilning yanvar oyi yakunlanayotgan bo‘lsa-da, ko‘chma konteynerlar hamon ish boshlagani yo‘q.