Navoiyda oltin qazish faoliyati bilan noqonuniy shug‘ullanib kelgan guruh ushlandi

Navoiyda noqonuniy oltin qazuvchilar faoliyatiga chek qo‘yildi. Bu haqda Davlat xavfsizlik xizmati xabar berdi.

Ma’lum qilinishicha, DXX Navoiy viloyati bo‘yicha boshqarmasi hamda viloyat IIB xodimlari tomonidan davlat zaxirasidagi yerlarda noqonuniy oltin qazib olish va uni kimyoviy qayta ishlash bilan shug‘ullanuvchilar faoliyatiga chek qo‘yish maqsadida tezkor tadbir o‘tkazilgan. Unda noqonuniy oltin savdosiga ixtisoslashgan uyushgan guruh xorijiy davlat fuqarolarini jalb qilgan holda soliq, geologiya, ekologiya va atrof-muhitni muhofaza qilish sohasidagi qator qonunchilik talablariga zid ravishda faoliyat yuritib kelgani aniqlangan.

Guruhga Karmana tumanidagi sport sohasiga ixtisoslashgan MChJ rahbari boshchilik qilgan.

O‘tkazilgan tadbirda qonunbuzarlardan 17,2 kg oltin va kumush qorishmasi, 20 kg yarim tayyor oltin mahsuloti, tarkibida oltin zarralari bo‘lgan 250 kg boyitilgan ko‘mir hamda 280 tonnadan ortiq qum va rudalar, 230 litr maxsus kimyoviy vositalar, oltinni ajratib olishga mo‘ljallangan laboratoriya va jihozlari, maxsus idishlar, gazballonlar hamda boshqa asbob-uskunalar ashyoviy dalil sifatida rasmiylashtirib olingan.

Uyushgan guruh tomonidan oltinni ajratib olish uchun sun’iy yaratilgan 4 ta hovuz kimyoviy vositalar bilan to‘ldirilib, 1 gektar yer sanoat ishlab chiqarish maydoniga aylantirilgan.

Hozirda ashyoviy dalillar ekspertizaga yuborilib, holat yuzasidan tergovga qadar tekshiruv harakatlari olib borilmoqda.