Aholini ro‘yxatga olish bo‘yicha eng yuqori va past ko‘rsatkichli hududlar ma’lum qilindi

Onlayn ro‘yxatdan o‘tish bosqichi bugun o‘z nihoyasiga yetadi. Ushbu bosqichda qatnashmagan fuqarolar uchun Aholi va qishloq xo‘jaligini ro‘yxatga olish tadbirining ikkinchi bosqichi o‘tkaziladi. Bunda “Mahalla yettiligi” vakillari uyma-uy yurib, ma’lumotlar planshet qurilmalari orqali census.stat.uz platformasiga kiritiladi.

Foto: moiti.uz

31 yanvar soat 11:00 holatiga ko‘ra, census.stat.uz portali orqali O‘zbekistonda jami xonadonlarning 79 foizida istiqomat qiluvchi, ya’ni 29 million nafardan ortiq fuqaro onlayn ro‘yxatdan o‘tdi.

Eng yuqori ko‘rsatkichlar Xorazm (90,5 %), Namangan (86,8 %), Sirdaryo (85 %), Andijon (84,2 %) va Surxondaryo viloyatlarida (83,9 %) qayd etilgan.

Jizzax (80,3 %), Toshkent (80,3 %), Samarqand (76,7 %), Buxoro (74,9 %), Farg‘ona viloyatlari (74,2 %) va Toshkent shahrida (62,8 %) nisbatan past ko‘rsatkichlar kuzatilmoqda.

Onlayn ro‘yxatdan o‘tish bosqichi bugun o‘z nihoyasiga yetadi. Ushbu bosqichda qatnashmagan fuqarolar uchun Aholi va qishloq xo‘jaligini ro‘yxatga olish tadbirining ikkinchi bosqichi — “Mahalla yettiligi” vakillari tomonidan uyma-uy yurib, ma’lumotlar planshet qurilmalari orqali census.stat.uz platformasiga kiritiladi.

Savolnomani xato yoki to‘liq bo‘lmagan holda to‘ldirgan fuqarolar uchun avtomatik ogohlantirish tizimi joriy etilgan. Sertifikat oynasida ko‘k rangli “Sertifikat tasdiqlandi” yozuvi chiqsa, ma’lumotlar to‘g‘ri kiritilgan hisoblanadi. Qizil rangli “Ma’lumotlar to‘liq emas” ogohlantirishi paydo bo‘lsa, kamchiliklarni bugun, onlayn ro‘yxatdan o‘tish bosqichi yakunlanguniga qadar, oxirgi marotaba bartaraf etish tavsiya etiladi. Aks holda, 4–28 fevral kunlari mahalla vakillari tomonidan qayta ro‘yxatdan o‘tkazish amalga oshiriladi.