Aviatsiya kadrlari tayyorlash tizimi yangilanadi: universitet va texnikum tashkil etiladi

Prezident Shavkat Mirziyoyev ishtirokida o‘tgan yig‘ilishda aviatsiya sohasi uchun kadrlar tayyorlash tizimini tubdan takomillashtirish masalalari ko‘rib chiqildi. Fuqaro aviatsiyasi universiteti va uning qoshida aviatsiya texnikumini tashkil etish rejalari taqdim etildi.

Foto: Prezident matbuot xizmati

Taqdimotda ta’lim tizimini xalqaro standartlar asosida yo‘lga qo‘yish, sohadagi ehtiyojdan kelib chiqqan holda zamonaviy mutaxassislar tayyorlash ustuvor vazifa sifatida belgilandi. Yangi universitet va texnikum aviatsiya sohasi uchun amaliy va nazariy bilimlarni uyg‘unlashtirgan ta’lim modelini joriy etadi.

Ma’lum qilinishicha, ta’lim muassasalari AQShning Embry-Riddle va Fransiyaning ENAC kabi yetakchi xalqaro aviatsiya ta’lim markazlari bilan hamkorlikda tashkil etiladi.

Universitetda bort kuzatuvchi, aviatsiya texnikasi bo‘yicha mutaxassis va mexaniklar kabi amaliy kasblar bilan bir qatorda uchuvchilik, muhandislik, havo harakati dispetcherligi, boshqaruv yo‘nalishlarida ham kadrlar tayyorlash hamda ilmiy dasturlarni yo‘lga qo‘yish ko‘zda tutilgan.

Yig‘ilishda ta’lim sifatini oshirish, o‘quv jarayonlarini zamonaviy trenajyor va laboratoriyalar bilan jihozlash, xalqaro sertifikatlash tizimini joriy etish bo‘yicha vazifalar belgilab berildi. Prezident takliflarni ma’qullab, mas’ullarga tegishli topshiriqlar berdi.