Belgorodda - raketa zarbasidan keyin blekaut

Uning aytishicha, Ukraina Qurolli kuchlari Belgorod shahri va Belgorod okrugiga zarba bergan. Dastlabki ma’lumotlarga ko‘ra, jabrlanganlar yo‘q. “Infratuzilma obektida jiddiy shikastlar bor”, — deya qo‘shimcha qildi gubernator.

Vayronagarchiliklar hajmini aniqlash uchun hokimiyat tezkor shtab yig‘ilishini o‘tkazgan, favqulodda xizmatlar infratuzilmani tiklash ishlariga kirishgan.

Telegram’dagi "Pepel" kanaliga ko‘ra, Belgorod atrofidagi ikki muhim elektrpodstansiyaga raketa zarbalari berilishi oqibatida shaharda blekaut yuz bergan.

Kanal versiyasiga ko‘ra, o‘qqa tutilgan obektlar — Belgorod okrugining Dragunskoye qishlog‘i hududidagi “Frunzenskaya” podstansiyasi va shaharning “Belgorod” podstansiyasi.

“Pepel” yozishicha, zarbadan keyin Belgorod viloyatining kamida to‘qqizta munitsipalitetida elektr qisman yoki to‘liq o‘chgan. Ularning ma’lumotiga ko‘ra, Belgorodda AYoQShda benzin uchun navbatlar paydo bo‘lgan, ko‘pchilik generatorlar uchun yonilg‘ini zaxira uchun olmoqda.

Ayrim uylarga issiqlik va suv berilishi to‘xtagan, isitish tizimi o‘chgan. Ko‘chadagi harorat minus 22°C gacha tushgan. Ayniqsa shahar markazida suv yo‘qligi qayd etilgan.

Belgorod viloyati “Vodokanal”ning Telegram-kanalida shaharning barcha suv olish inshootlarida, Xarkiv tog‘ligi hududini ta’minlovchi nasos stansiyasida, shuningdek ayrim oqova suv obektlarida elektr o‘chirilgani xabar qilingan.

Rakityanskiy va Krasnoyarujskiy okruglarida vodokanal obektlari to‘liq, Yakovlevskiy okrugda esa qisman elektrsiz qolgan. Suv ta’minoti tizimlari Shebekino shahrida, Maslova Pristan va Grafovka posyolkalarda izdan chiqqan. Mutaxassislar tizimlarni zaxira elektr manbalariga ulashni boshlagan.

3 fevralga o‘tar kechasi Rossiya qo‘shinlari Ukrainaning energiya tizimiga hujum qilgan. Ukraina hokimiyati ma’lum qilishicha, elektr energiyasini ishlab chiqarish va taqsimlash obektlari nishonga olingan. Minus 20°C sovuqda minglab odamlar issiqliksiz qolgan.

Ukraina prezidenti Volodimir Zelenskiy energotizim bo‘yicha selektor yig‘ilishi yakunlari yuzasidan ijtimoiy tarmoqlarda shunday yozgan: bu energetikaga qaratilgan maqsadli zarba bo‘lgan, ballistik raketalar soni rekord darajada. Uning ta’kidlashicha, Rossiya AQSh taklif qilgan qisqa muddatli “pauza”dan diplomatiya uchun emas, balki raketalarni to‘plab, yilning eng sovuq kunlarini kutib, keng ko‘lamli hujum qilish uchun foydalangan.

Zelenskiy so‘zlariga ko‘ra, Rossiya 32 ta ballistik raketa, ballistik trayektoriya bo‘ylab nishonga kiradigan boshqa turdagi yana 11 ta raketa, 28 ta qanotli raketa va 450 ta hujumkor dron qo‘llagan.