Bill Geytsning sobiq rafiqasi uni Epshteyn fayllari bilan bog‘liq «savollarga javob berish»ga chaqirdi

Microsoft asoschilaridan biri Bill Geytsning sobiq rafiqasi Melinda French-Geyts u pedofillik uchun qamalgan Jyeffri Epshteynning fayllarida nomi tilga olingani ortidan paydo bo‘lgan savollarga «javob berishi» kerakligini aytdi. French-Geytsning so‘zlariga ko‘ra, hujjatlar e’lon qilinishi uni o‘zaro turmushdagi «juda og‘riqli davr»ni yodga olishga majbur qilgan.

«Bu gap yana ochilishi shaxsan men uchun juda og‘ir. Chunki bu meni nikoh davridagi juda og‘riqli damlarni eslashga majbur qiladi», – dedi Melinda French-Geyts NRR Wild Card podkastida. Podkast payshanba kuni to‘liq shaklda e’lon qilinishi rejalashtirilgan.

«Qanday savollar tug‘ilgan bo‘lmasin, men esa buning barchasini tasavvur ham qila olmayman, bu savollar [hujjatda keltirilgan] odamlar uchundir, shu jumladan, mening sobiq turmush o‘rtog‘im uchun ham», – deya qo‘shimcha qiladi u.

Bill Geytsning Jyeffri Epshteyn bilan aloqalari haqida 2019 yildayoq ma’lum edi; amerikalik jurnalistlarga ko‘ra, o‘shanda Melinda French-Geyts ajrashish haqida o‘ylay boshlagan. Yakunda ushbu juftlik 2021 yilda ajrashadi.

Microsoft asoschisining nomi Epshteyn ishi bo‘yicha AQSh Adliya vazirligi tomonidan e’lon qilingan hujjatlarning so‘nggi qismida tilga olingan – Ilon Maskdan tortib Britaniya qiroli Charlz III’ning ukasi Endryugacha bo‘lgan boshqa ko‘plab nufuzli shaxslarning ismlari bilan birga.

Shu bilan birga, Bill Geytsga nisbatan hech qanday ayblov qo‘yilmagan va hujjatlarda uning ismi tilga olinishining o‘zi u qonunga zid biror ish qilganini anglatmaydi.

Hujjatlar orasida 2013 yil 18 iyulda Bill Geytsga yozilgan ikkita xat ham bor, Epshteyn ularni o‘zining elektron pochtasiga yuborgan. U bu xatlarni tadbirkorga jo‘natganmi-yo‘qmi, bunisi noma’lum.

Xatlardan biri Bill va Melinda Geyts jamg‘armasidan ishdan bo‘shash to‘g‘risidagi ariza sifatida yozilgan. Unda Epshteyn Bill Geytsga «rus qizlari bilan jinsiy aloqaning oqibatlarini bartaraf etish uchun» dori-darmon topib berganini iddao qiladi.

Ikkinchi xatni esa u «qadrdonim Bill» so‘zlari bilan boshlagan. Unda Epshteyn Bill Geyts u bilan do‘stona muloqotni to‘xtatib qo‘yganidan nolib, yana bir bor Microsoft rahbari o‘zidan jinsiy yo‘l orqali yuqadigan kasalliklardan tuzalish uchun antibiotiklar topib berishni va bu dorilarni iloji boricha Melindaga bildirmasdan yetkazishni so‘ragani haqida yozgan.

«Bu hujjatlar Epshteynning Geyts bilan aloqasi uzilganidan hafsalasi pir bo‘lganini va tuhmat qilish va tuzoqqa tushirish uchun qanchalik nimalarga tayyorligini ko‘rsatadi», – degan NPR radiosiga Geytsning vakillari.

Geytsning o‘zi uni Epshteyn bilan bir necha kechki ovqatdan boshqa narsa bog‘laganini rad etadi.

Avstraliyaning 9News kanaliga intervyusida u Epshteyn bilan uchrashganidan afsusdaligini hamda uning oroliga hech qachon bormaganini aytgan. Geyts shuningdek Epshteyn fayllarida keltirilgan xatlar o‘ziga kelmaganini aytgan.

«U [Epshteyn] juda ko‘plab badavlat odamlarni tanirdi va ularni global sog‘liqni saqlash tizimiga xayriya qilishga ko‘ndira olishini aytardi. Bu boshi berk ko‘cha bo‘lganini endi anglab yetdim», – deya izohlagan Geyts o‘zining Epshteyn bilan uchrashuvlarini.

«U bilan birga vaqt o‘tkazish ahmoqlik edi. Men – u bilan tanish bo‘lgani uchun afsuslanadigan ko‘plab odamlardan biriman», – deya qo‘shimcha qilgan u.