Epshteyn hujjatlari. Sobiq shahzoda Endryu Vindzordagi qasrni zudlik bilan bo‘shatib qo‘ydi

Sobiq shahzoda 2 fevral kuni Vindzordagi Royal-Loj saroyini tark etgan va Angliya sharqidagi Sandringhem mulkidagi Vud-Farm qo‘rg‘oniga borib joylashgan.

BBC ma’lumotlarga ko‘ra, bu – Endryu uchun vaqtincha qo‘nalg‘adir: keyinroq u qirollikning ushbu mulkidagi asosiy saroydan to‘rt kilometr masofada joylashgan hamda qirollik mezonlari bo‘yicha juda kamtarona hisoblangan Marsh-Farm qo‘rg‘oniga ko‘chib o‘tadi. Sandringhem mulkining umumiy maydoni – 80 km kv atrofida.

Bukinghem saroy o‘tgan yil oktyabr oyi oxirida Endryu 2026 yil boshida boshqa joyga ko‘chib ketishini e’lon qilgandi; Epshteyn ishi bo‘yicha hujjatlarning navbatdagi partiyasi e’lon qilinishi chiqishi esa bu jarayonni tezlashtirgan.

Britaniya jamoatchiligi Endryu AQShda pedofillikda ayblanib qamalgan Epshteyn bilan munosabatlari yuzasidan ko‘rsatma berishini qat’iyat bilan talab qilmoqda. Endryu esa hech qanday noqonuniy ishga aloqasi yo‘qligini aytib keladi.

Sandringhem – qirol Charlz III’ning xususiy mulki bo‘lib, ukasining yangi turar joyi uchun barcha xarajatlarni uning o‘zi to‘laydi.

Endryuning xulq-atvori va reputatsiyasi anchadan buyon qirollik xonadoni uchun jiddiy muammo bo‘lib kelgan hamda shahzodaga nisbatan qarorlar kechiktirilgan va yetarli emasdek tuyulgan.

Endi saroydagilar Endryuning Sandringhemga – qirol Charlz va qirolicha Kamilla yashovchi Londondan hamda valiahd shahzoda Uilyam oilasi bilan birga istiqomat qiladigan Vindzordan uzoqqa ketishi – sobiq shahzoda imkon qadar jamoatchilik e’tiboridan chetda bo‘lishiga imkon berishidan umid qilmoqda.

U Vindzordagi hashamatli saroyda yasharkan, bu jamoatchilikda norozilik uyg‘otayotgandi.

Vindzor mulki hamda undagi qirollik qasri, Sandringhemdan farqli o‘laroq, qirolga emas, balki Moliya vazirligiga hisobdor bo‘lgan «Qirollik mulklari» nomli maxsus davlat muassasasiga tegishli hisoblanadi.

Qirollik xonadoniga yaqin manbalar anonimlik sharti bilan izoh berishicha, bir tomondan, oiladagilar xatolari uchun Endryuni qandaydir tarzda jazolash zarurligini to‘g‘ri tushundi, boshqa tomondan, u hamon oila a’zosi va unga g‘amxo‘rlik qilish kerak. Shuning uchun qirol unga o‘z hisobidan Norfolkda yashash uchun uy berdi.

Oktyabr oyida qirol ukasini shahzodalik unvonidan va unda qolgan boshqa barcha titullardan mahrum etgandi, undan oldinroq Endryuning o‘zi o‘z ixtiyori bilan York hersogi unvonidan voz kechgandi.

Endryu yaqin vaqtlar ichida qolgan buyumlarini ham olib ketish uchun Vindzorga yana kelishi kutilmoqda.

Uni Vindzorda so‘nggi bor dushanba kuni ko‘rishgan – u qo‘rg‘on atrofida otda sayr qilib yurgandagi surati tarqalgan. Bundan tashqari, uni Vindzor qal’asidan mashinada chiqayotganida suratga olishgan. Saroydagilarga esa uning qo‘l silkib tushgan bu suratlari yoqmagan.

Oktyabr oyida saroyga yaqin manbalar Endryuning saroyni tark etishi keyingi yilga qoldirilgani haqida xabar berilgandi – qirollik xonadoni a’zolari Rojdestvoni Sandringhemda kutib olishgan va u yerda Endryu ham bo‘lishini istashmagan.

Sandringhem 1862 yilda o‘sha vaqtdagi Uels shahzodasi Albert (keyinroq Edvard VII) tomonidan sotib olingandi.

Ushbu mulk hududida bir nechta qishloq va xutorlar, shuningdek, taxminan 40 km. kv maydonni egallovchi qishloq xo‘jaligi yerlari mavjud. Mulkning asosiy binosi – Sandringhem-Haus – ba’zi ma’lumotlarga ko‘ra, bal zalini ham o‘z ichiga olgan yuzdan ortiq xonalardan iborat.

Mauntbetten-Vindzorning Jyeffri Epshteyn bilan aloqalari bo‘yicha tergov davom etmoqda. Britaniya politsiyasi amerikalik advokat Bred Edvardsning Epshteyn kamida bir marta, 2010 yilda shahzoda Endryu bilan jinsiy aloqa qilish uchun bir ayolni Buyuk Britaniyaga yuborgani haqidagi bayonotini o‘rganmoqda.

Epshteynning qurbonlari manfaatlarini ifoda etuvchi ushbu huquqshunos Buyuk Britaniya fuqarosi bo‘lmagan hamda 20 yoshdan kichik bo‘lgan ushbu ayolni Royal-Lojda qabul qilgani, tunni u bilan o‘tkazgani, keyin esa uning uchun Bukinghem saroyida ekskursiya uyushtirgani haqida aytib bergan.

BBC Endryu Mauntbetten-Vindzordan izoh so‘ragan, ammo u hali javob qaytarmagan, bungacha bergan bayonotlarida esa har qanday qonunbuzarlikka aloqdorligini qat’iyan rad etgan.

Bu ayolning Royal-Lojda o‘tgan kecha haqidagi hikoyasi – Epshteynning qurboni tunni qirollik qarorgohida o‘tkazgani bilan bog‘liq birinchi holatdir.

Shahzoda Endryuga nisbatan bunday «uchrashuvlar» bo‘yicha ilk ayblov 2014 yilda Virjiniya Juffre tomonidan e’lon qilingandi. U 17 yoshligida Epshteyn va uning yordamchisi Gisleyn Maksvell uni Endryu bilan jinsiy aloqa qilishga majburlagani haqida aytib bergandi. Sobiq shahzodaning o‘zi esa bu kabi ishlar bo‘lganini tan olmagan.

Juffre 2021 yilda AQShda Endryuga qarshi fuqarolik da’vosi qo‘zg‘atadi, 2022 yil fevralida ish tomonlarning kelishuviga ko‘ra yopiladi, norasmiy xabarlarga ko‘ra, o‘shanda Virjiniya Juffrega 12 mln funt to‘lab berilgan.

2025 yil Juffre o‘z joniga qasd qildi.

AQShda Epshteyn ishi bo‘yicha hujjatlarning so‘nggi qismi e’lon qilinishidan keyin sobiq shahzodaning Epshteyn bilan aloqalari yana e’tibor markaziga tushdi.

AQSh Adliya vazirligi tomonidan e’lon qilingan minglab fotosuratlar orasida sobiq shahzoda polda chalqancha yotgan ayolning tepasida to‘rt oyoqlab turgani aks etgan surat ham bor, shuningdek, uch million sahifali matnli hujjatlar orasida Epshteyn va Endryu o‘rtasidagi elektron yozishmalarning navbatdagi parchalari mavjud bo‘lib, bu yozishmalar Epshteyn voyaga yetmaganlarni yo‘ldan ozdirganini tan olgan vaqtga mansubdir.