Norvegiya politsiyasi sobiq bosh vazirning Epshteyn bilan aloqalarini tekshirmoqda

Turbyorn Yaglandni Jyeffri Epshteyn bilan bog‘liq og‘ir korrupsiya jinoyatlarida gumon qilishmoqda. Norvegiya politsiyasi tergov boshladi. Biroq mamlakatning sobiq bosh vaziri advokati ish ijobiy yakun topishiga ishonch bildirmoqda.

Foto: AP

Norvegiya politsiyasining iqtisodiy jinoyatlarga qarshi kurash bo‘linmasi (Oekokrim) mamlakatning sobiq bosh vaziri, Norvegiya Nobel qo‘mitasining sobiq raisi Turbyorn Yaglandga nisbatan tergov boshladi. Bu haqda Reuters agentligi payshanba, 5 fevral kuni xabar berdi. Aniqlashtirilishicha, Yaglandga nisbatan amerikalik moliyachi Jyeffri Epshteyn (fohishabozlikni tashkil etgani uchun sudlangan) bilan bog‘liq og‘ir korrupsiya jinoyatlari haqidagi shubhalar mavjud.

“Oshkor qilingan hujjatlar qamrab olgan davrda u (Turbyorn Yagland — tahr.) Norvegiya Nobel qo‘mitasi raisi va Yevropa Kengashi bosh kotibi lavozimlarida ishlagan. Shuning uchun tekshiruv o‘tkazishga jiddiy asoslar bor, deb hisoblaymiz”, — dedi Oekokrim rahbari Paal Lyoset. U tergovni boshlashga sabab sifatida Epshteyn ishi bo‘yicha yaqinda oshkor qilingan yangi hujjatlardagi ma’lumotlarni ko‘rsatdi.

Reuters yozishicha, hozircha Yaglandga nisbatan hech qanday ayblov qo‘yilmagan. Jurnalistlar ma’lumotiga ko‘ra, tergovchilar u yuqorida tilga olingan lavozimlarda ishlagan paytida sovg‘alar olgan-olmagani, sayohatlarga chiqqan-chiqmagani yoki kreditlar olgan-olmaganini tekshirmoqda. Shu maqsadda politsiya undan immunitetni olib tashlashni so‘ragan, chunki u xalqaro tashkilotning sobiq rahbari sifatida muayyan immunitetga ega bo‘lgan.

O‘z navbatida, Norvegiya TIV rahbari Espen Bart Eyde bu iltimosni qondirishini ma’lum qildi. “Bu ishda faktlar oydinlashishi muhim”, — deb ta’kidladi vazir. U Oslo Yevropa Kengashi vazirlar qo‘mitasiga Turbyorn Yaglandni immunitetdan mahrum qilish taklifini kiritishini va’da qildi.

Yagland advokatlaridan biri esa mijozi tergov bilan har tomonlama hamkorlik qilishini bildirdi. “Hozirgacha aniqlagan ma’lumotlarimizga tayanib, ish ijobiy yakun topishiga ishonamiz”, — dedi u.

Nobel qo‘mitasi matbuot kotiblaridan biri bu mavzuda izoh berishdan bosh tortdi, biroq Norvegiya qo‘mitasi ham mazkur ish tergov qilinishiga qiziqish bildirayotganini qo‘shimcha qildi.

Reuters eslatishicha, Yagland — Norvegiyada Epshteyn bilan aloqalari tekshirilayotgan yagona taniqli shaxs emas. Masalan, valiahd malika Mette-Marit Epshteynga ayblov hukmi chiqarilganidan keyin ham u bilan aloqani davom ettirganini tan olgan. Bu holatni u o‘zi “noto‘g‘ri baholash” deb atagan.