Issiq va yomg‘irli hafta

Haftada bahoriy ob-havo hukm surishi: yomg‘irlar fonida havo issiq bo‘lishi kutilmoqda. Iqlimshunos Erkin Abdulahatov yaqin o‘n kunlikdagi ob-havo kutilmalarini Kun.uz'ning jonli efirida tanishtiradi. 

Joriy hafta juda issiq va shu bilan birga yog‘ingarchilikka boy bo‘lishi kutilmoqda. Chorshanba-payshanba kunlari aksar viloyatlarda ko‘p yomg‘ir yog‘ishi prognoz qilinmoqda. Poytaxtda bu hafta kutilayotgan yog‘ingarchilik miqdori oylik normaga juda yaqin bo‘lishi oydinlashmoqda. Hafta boshi hamda juma va dam olish kunlari ko‘plab hududlarda harorat +18...+23 darajagacha issiq bo‘lishi kutilmoqda.

Keyingi hafta ham issiq havo oqimi ta’sirida bo‘lishi, bahor boshlariga xos ob-havo muhiti saqlanishi kutilmoqda. Umuman olganda, fevralning ikkinchi o‘n kunligi juda issiq va shu bilan birga namgarchil o‘tishi, ayrim hududlarda fevralga xos bo‘lmagan g‘ayritabiiy issiqliklar bo‘lishi kutilmoqda, bu esa dov-daraxtlarni juda erta o‘sish davriga kirib qolishini ta’minlaydi.

Joriy fevral o‘rtasini mart oyi oxirlari va aprel boshlariga qiyoslash mumkin. Tog‘larga esa qor ustiga yana qor yog‘ishi aniq bo‘lmoqda. Tinch okeani markazidagi suv harorati passiv La-Ninyadan asta-sekin barqaror holatdagi neytral holatga o‘tish arafasida turibdi. Meteorologlar joriy yoz oyida El-Nino rivojlanishi ishoralariga e’tibor qaratishmoqda. Bu esa dunyo bo‘ylab yozning issiq bo‘lishi, bizning mintaqada esa aksincha mo‘’tadil yoz bilan bog‘liq kutilmalar kelib chiqmoqda.