Qarorga ko‘ra, vazirlikning hududiy bo‘linmalarida «uy-joy kommunal xo‘jaligini rivojlantirish va ekspluatatsiya ishlarini muvofiqlashtirish bo‘yicha bosh muhandis» lavozimi joriy etildi. Ushbu lavozim Qoraqalpog‘iston Respublikasi, viloyatlar hamda barcha tuman va shaharlarda mavjud shtatlar, shuningdek budjetdan ajratiladigan qo‘shimcha 89 ta shtat birligi hisobidan tashkil etiladi.
Yangi tartibga asosan, viloyat darajasidagi bosh muhandislar hududiy boshqarma boshlig‘ining o‘rinbosari hisoblanadi va to‘g‘ridan-to‘g‘ri vazir o‘rinbosariga bo‘ysunadi. Bu, o‘z navbatida, ko‘p kvartirali uylar ekspluatatsiyasi, kommunal xizmatlar va joylardagi texnik masalalarni muvofiqlashtirishda boshqaruv va mas’uliyatni yanada aniqlashtirishi kutilmoqda.
Shu bilan birga, tuman va shahar bosh muhandislari bevosita viloyat bosh muhandislariga bo‘ysunadigan tartib belgilanib, sohada yagona vertikal tizim shakllantirildi.
Qayd etilishicha, ushbu bosh muhandis shtat birliklari davlat xizmatchilarini qisqartirish bo‘yicha topshiriqlardan mustasno etib belgilangan.
