Qamchibek Tashiyev ishdan ketdi

Qirg‘iziston Milliy xavfsizlik davlat qo‘mitasi raisi Qamchibek Tashiyev lavozimini tark etdi. Mamlakat prezidenti Sadir Japarov uning vakolatlarini muddatidan oldin tugatish to‘g‘risidagi farmonini imzoladi.

Uning uch o‘rinbosari – Daniel Risaliyev, Qurbonbek Avazov hamda Elizar Smanov, shuningdek, Xavfsizlik kengashi kotibi Rustam Mamasodiqov ham lavozimidan ozod etilgan.

Japarov bu qarorni «davlat manfaatlarini ko‘zlab, jamiyatda, jumladan, davlat tuzilmalari o‘rtasida tarqoqlikka yo‘l qo‘ymaslik, aksincha – birdamlikni mustahkamlash maqsadida qabul qilgani»ni aytdi.

O‘z navbatida, Tashiyev o‘rniga Jumgalbek Shabdanbekov Vazirlar Mahkamasi raisi o‘rinbosari – Milliy xavfsizlik davlat qo‘mitasi raisi vazifasini bajaruvchi etib tayinlandi.

Hozirda 55 yoshda bo‘lgan Shabdanbekov 2020 yildan buyon mazkur qo‘mita raisi o‘rinbosari – qo‘mitaning 9-xizmati (Davlat qo‘riqlash xizmati) boshlig‘i lavozimida ishlab kelgan. 2022 yilda unga general-mayor unvoni berilgan.

Qamchibek Tashiyev 2020 yil 16 oktyabrida Qirg‘iziston Milliy xavfsizlik davlat qo‘mitasi raisi etib tayinlangandi.

24.kg nashri Qamchibek Tashiyev va mamlakat prezidenti Sadir Japarov o‘rtasidagi ko‘p yillik munosabatlar har doim mamlakatdagi eng barqaror va nufuzli siyosiy ittifoqlardan biri sifatida qaralganini qayd etgan. Ularning hamkorligi hokimiyatga kelishdan ancha oldin boshlangan: 2010-yillar boshlarida ular bir necha bor siyosiy jarayonlarda safdosh bo‘lishgan, 2012 yilda bir epizod bo‘yicha sudlangan, bu esa ularning shaxsiy aloqalarini yanada mustahkamlagan.

2020 yil oktyabridagi voqealardan keyin prezidentlikka kelgan Sadir Japarov Qamchibek Tashiyevni Milliy xavfsizlik davlat qo‘mitasi rahbari etib tayinlaydi va u kuchishlatar blokning muhim tayanchiga aylanadi. 

Mamlakatdagi eng shov-shuvli ishlarni aynan u nazorat qilgan, kuch siyosatini shakllantirgan va amalda prezident jamoasining eng yaqin ishonchli vakili hisoblangan.

Ekspertlar ularning ittifoqini mamlakatning eng kuchli siyosiy dueti deb atagan va Qamchibek Tashiyev atrofidagi har qanday kadrlar o‘zgarishiga hokimiyat konfiguratsiyasidagi jiddiy o‘zgarishlar ko‘rsatkichi sifatida qaralgan.

So‘nggi paytlarda siyosiy doiralarda maxsus xizmat rahbari navbatdagi prezidentlik saylovlarida ishtirok etishi mumkinligi haqida mish-mish tarqalgandi. Qamchibek Tashiyevning o‘zi esa bir necha bor prezidentlik poygasida ishtirok etish niyatida emasligini va Sadir Japarovni qo‘llab-quvvatlashini ta’kidlagan.