Qallibek Kamalov 100 yoshda vafot etdi

Atoqli davlat va jamoat arbobi, taniqli mehnat faxriysi Qallibek Kamalov shu yil 11 fevral kuni 100 yoshida vafot etdi. Prezident matbuot xizmati uning vafoti munosabati bilan hamdardlik e’lon qildi.

«U ko‘p yillik serqirra mehnat faoliyati davomida boy bilim va tajribasi, rahbarlik salohiyati, yuksak insoniy fazilatlari, Vatanimizga beqiyos mehri va sadoqati bilan el-yurt qalbidan chuqur joy olgan ulug‘ inson edi. Uning bevosita rahbarligida Qoraqalpog‘iston Respublikasini har tomonlama taraqqiy ettirish, mavjud murakkab iqlim sharoitida paxtachilik, g‘allachilik, chorvachilik va boshqa qishloq xo‘jaligi tarmoqlarini, shuningdek, sanoat va ishlab chiqarishni ravnaq toptirish, aholining turmush darajasini yaxshilash bo‘yicha salmoqli ishlar amalga oshirildi.

Qallibek Kamalov so‘nggi yillarda Qoraqalpog‘iston Respublikasi nuroniylar jamoatchilik kengashi raisi sifatida keksalar va nuroniylarni qo‘llab-quvvatlash, ularning manfaatlarini ro‘yobga chiqarish, jamiyatda tinchlik, mehr-oqibat, bag‘rikenglik va hamjihatlik muhitini mustahkamlash, yoshlarni Vatanga muhabbat, milliy va umuminsoniy qadriyatlarga hurmat ruhida tarbiyalash borasidagi ishlarda faol ishtirok etib keldi.

Atoqli davlat va jamoat arbobi, yoshlarning mehribon ustozi, samimiy va kamtarin inson Qallibek Kamalovning xotirasi qalblarimizda doimo saqlanib qoladi», – deyiladi ta’ziya matnida.

Qallibek Kamalov 1926 yil 18 martda Qoraqalpog‘istonning Taxtako‘pir tumanida tug‘ilgan. O‘rta maktabni tugatib, harbiy xizmatni o‘tab bo‘lgach, 1955 yilda Nukus davlat universitetini tamomlagan.

Mehnat faoliyatini Qoraqalpog‘iston Respublikasi yoshlar qo‘mitasi kotibi lavozimidan boshlab, keyinchalik turli yillarda Qoraqalpog‘iston ASSR Vazirlar Kengashi raisining o‘rinbosari, Nukus shahar ijroiya qo‘mitasi raisi, kommunal xo‘jaligi vaziri, respublika avtomobil transporti va avtomobil yo‘llari vaziri bo‘lgan.

1958–1959 yillarda O‘zbekiston Kompartiyasi Qoraqalpog‘iston qo‘mitasi kotibi, 1959–1963 yillarda Qoraqalpog‘iston ASSR Vazirlar Kengashi raisi, 1963–1984 yillarda O‘zbekiston Kompartiyasi Qoraqalpog‘iston qo‘mitasining birinchi kotibi bo‘lib ishlagan.

1984–1986 yillarda SSSRning Konstansa (Ruminiya) shahridagi bosh konsuli bo‘lgan.

1987 yilda «paxta ishi» bo‘yicha qamoqqa olingan. 1989 yil oxirida 15 yilga ozodlikdan mahrum qilingan va Sotsialistik Mehnat Qahramoni unvoni hamda boshqa ko‘plab mukofotlardan mahrum qilingan. Keyinchalik u ish bo‘yicha boshqa mahkumlar kabi afv etilgan.

Qallibek Kamalovning ukasi Timur Kamalov 1997–2002 yillarda Qoraqalpog‘iston Jo‘qorg‘i Kengesi raisi bo‘lgan. 2020–2022 yillarda esa Qallibek Kamalovning o‘g‘li Murat Kamalov ham xuddi shu lavozimda ishlagan.

Qallibek Kamalov «Shuhrat» medali va «El-yurt hurmati» ordeni bilan mukofotlangandi.