Xarkiv viloyatiga zarba: 4 kishi halok bo‘ldi

Ukrainaning Xarkiv viloyatidagi Bogoduxov shahriga Rossiya uchuvchisiz apparati zarbasi natijasida uch nafar kichik yoshdagi bola va bir erkak halok bo‘ldi. Bu haqda chorshanbaga o‘tar kechasi, 11 fevral kuni, viloyat harbiy ma’muriyati rahbari Oleg Sinegubov xabar berdi.

Uning so‘zlariga ko‘ra, dron xususiy uyga urilgan, uy vayronalari ostida 34 yoshli erkak, ikki yoshli qizcha va bir yoshdan ikki nafar o‘g‘il bola qolib ketgan. Tibbiyot xodimlari va qutqaruvchilar ishlaganiga qaramay, ularni qutqarib qolishning imkoni bo‘lmagan. Shuningdek, Xarkiv viloyati harbiy ma’muriyati rahbari hujum vaqtida 35 yoshli homilador ayol jabrlanganini ma’lum qildi.

11 fevral kuniga o‘tar kechasi Rossiya qo‘shinlari Zaporijjya shahridagi infratuzilma obektiga ham dronlar bilan hujum qildi, deb xabar berdi Zaporijjya viloyati harbiy ma’muriyati rahbari Ivan Fedorov. Uning aytishicha, hujum natijasida shaharda taxminan 11 ming nafar aholi elektr ta’minotisiz qolgan.