Epshteyn ishi: Yevropa kengashi sobiq bosh kotibning daxlsizligini bekor qildi

Yevropa kengashi vazirlar qo‘mitasi amerikalik moliyachi Jyeffri Epshteyn ishi bo‘yicha hujjatlar e’lon qilinganidan keyin Norvegiyada boshlangan tergov munosabati bilan Norvegiyaning sobiq bosh vaziri va Yevropa kengashining sobiq bosh kotibi Turbyorn Yaglanddan immunitetni olib tashladi.

Bu qaror “Norvegiya adliya tizimi o‘z ishini bajarishiga, Yagland janoblari esa ayblov qo‘yilgan taqdirda o‘zini himoya qilishiga” imkon beradi, dedi Yevropa kengashining amaldagi bosh kotibi Alen Berse 11 fevral, chorshanba kuni. Yaglandning advokati esa mijozi bu ishga jiddiy qaraydi, deb javob berdi, biroq “jinoiy ta’qibga aloqador hech qanday dalil yo‘q”ligini ta’kidladi.

Bundan oldin Norvegiya politsiyasining iqtisodiy jinoyatlarga qarshi kurash bo‘limi — Oekokrim Yaglandga nisbatan og‘ir korrupsiya jinoyatlariga oid shubhalar mavjudligi sabab tergov boshlagan.

“Ommani xabardor qilingan hujjatlar qamrab olgan davrda u Norvegiya Nobel qo‘mitasi raisi va Yevropa kengashi bosh kotibi lavozimlarini egallagani uchun tekshiruv o‘tkazishga jiddiy asoslar bor, deb hisoblaymiz”, — dedi Oekokrim rahbari Paal Lyoset. U tergov boshlanishiga Epshteyn ishi bo‘yicha yangi e’lon qilingan materiallardagi ma’lumotlar asos bo‘lganini tushuntirdi. Hozircha Yaglandga nisbatan hech qanday ayblov qo‘yilmagan.

Norvegiyaning Verdens Gang gazetasi (Epshteyn ishi materiallarida Yaglandga doir qismni o‘rganib chiqqan) xabariga ko‘ra, Yaglandda Jyeffri Epshteyn tomonidan kvartira xaridi uchun kafolat bo‘lgan. Shuningdek, siyosatchi bir necha marta Epshteynning Nyu-York va Parijdagi kvartiralarida tunagan. AFP agentligi yozishicha, 2014 yilda Yagland va uning oilasi Epshteynning oroliga safar rejalashtirgan, ammo keyinchalik u bekor qilingan.

Yaglandning ta’kidlashicha, Epshteyn bilan aloqalari “odatiy diplomatik faoliyat”ning bir qismi bo‘lgan. Fevral oyi boshida u Aftenposten gazetasiga bu munosabatlarni saqlab qolgani “xatolik” bo‘lganini tan olgan.

Yagland Norvegiya bosh vaziri lavozimida 1996–1997 yillarda ishlagan, 2009–2015 yillarda Nobel tinchlik mukofotini berish qo‘mitasi raisi bo‘lgan, 2009–2019 yillarda esa Yevropa kengashi bosh kotibi vazifasini bajargan.