Ryutte: Tramp Ukrainada nima bo‘layotganini to‘liq anglab turibdi

AQSh prezidenti Donald Tramp Ukrainadagi “dahshatli vaziyat”ni “to‘liq anglab turibdi”, dedi NATO bosh kotibi Mark Ryutte 11 fevral, chorshanba kuni Bryusselda bo‘lib o‘tgan matbuot anjumanida. U DW'ning “Amerika ma’muriyati Ukrainaga bo‘layotgan bosimning hozirgi ko‘lamini tushunyaptimi?” degan savoliga shunday javob berdi.

Bu savolga va qo‘shimcha ravishda — Ryutte Ukrainaga safari paytida ko‘rganlarini Tramp bilan muhokama qilganmi va qandaydir fikr-mulohaza olganmi, degan savolga ham ikki marta “ha” deb javob qaytardi. Ammo u ular nimalar haqida gaplashganini “hech qachon oshkor qilmasligi”ni ta’kidladi. Bosh kotibning aytishicha, AQShda Ukrainada nima bo‘layotgani haqida “mutlaq aniqlik” bor, Ryutte va Trampning muntazam suhbatlarida ular “nima bo‘layotgani” va “nima ko‘rayotgani” haqida axborot almashib turadi. “Bu bizning doimiy muloqotlarimiz bir qismi”, — deb qo‘shimcha qildi u.

Shu bilan birga, Ryutte Ukraina safari yakunlari bo‘yicha Trampga aynan nima deganini va AQSh prezidentining reaksiyasi qanday bo‘lganini aniq aytmadi. U, shuningdek, bu muhokamalar Vashingtonning Ukrainaga kelgusidagi qo‘llab-quvvatlash masalasidagi pozitsiyasiga ta’sir qilgan-qilmagani haqida ham ma’lumot bermadi.

Bu qishda, NATOning yuqori lavozimli amaldorlari bahosi bo‘yicha, Rossiya Ukraina shaharlari va muhim infratuzilmaga hujumlarni sezilarli darajada kuchaytirgan. Umuman olganda, 2025 yilda RF taxminan 55 000 ta hujumkor dronni uchirgan — bu 2024 yilga nisbatan taxminan 5 baravar ko‘p.

Bryusseldagi brifingda alyansning yuqori lavozimli vakili Ukraina energetikasidagi vaziyatni o‘ta xavotirli deb atadi va Rossiya harbiy jihatdan “kam ahamiyatga ega yoki umuman ahamiyatga ega bo‘lmagan” fuqarolik energetika obektlariga zarbalar berishda davom etayotganini qayd etdi.

NATOning boshqa bir yuqori lavozimli amaldori “Rossiya hujumining susayishi kuzatilmayapti”, deb bildirdi va ballistik hamda qanotli raketalar, shuningdek uzoq masofali dronlar qo‘llangan havo hujumlari kuchayganini aytdi. Bu hujumlar aholini elektr va issiqlikdan mahrum qilish, shuningdek transport va turar joy hududlariga zarba berishga qaratilgan. NATO ma’lumotlariga ko‘ra, 2025 yil davomida frontorti hududlarga raketalar va dronlar bilan qilingan hujumlar soni ikki baravardan ko‘p oshgan.