«Barsa» yirik hisobda yutqazdi, «Arsenal» yana ochko yo‘qotdi

Ispaniya kubogi, yarimfinal, birinchi o‘yin
«Atletiko» – «Barselona» 4:0
Gollar: E. Garsiya, 6 – avtogol (1:0). Grizmann, 14 (2:0). Lukman, 33 (3:0). Alvares, 45+2 (4:0)
«Atletiko»: Musso, Gansko, Pubil, Rudjyeri, Molina, Koke (Le Norman, 90), Liorente, Lukman (Almada, 73), Simeone, Grizmann (Baena, 68), Alvares (Syorlot, 68)
«Barselona»: X. Garsiya, Kubarsi (Joau Kanselu, 77), E. Garsiya, Balde (Arauxo, 77), Kunde, de Yong, Fermin Lopes (Martin, 87), Kasado (Levandovski, 37), Olmo, Yamal, Torres
Ogohlantirishlar: Simeone, 50. Liorente, 51. Baena, 79. Pubil, 86. Rudjyeri, 90 – Kasado, 26. Olmo, 86. Fermin Lopes, 86
Chetlatish: E. Garsiya, 85

Ispaniya kubogi yarimfinalining birinchi o‘yinida «Barselona» o‘z muxlislarini karaxt holatga solib qo‘ydi. Kataloniyaliklar 2020 yil avgustidan buyon ilk bor birinchi bo‘limning o‘zida javobsiz to‘rtta gol o‘tkazib yubordi.

«Barselona» Xulian Alvaresga qiziqayotgani va Diyego Simeone iste’foga chiqarilishi mumkinligi haqidagi xabarlar fonida bo‘lib o‘tgan o‘yinga madridliklar katta ishtiyoq bilan tushishgandi. Mezbonlar ilk daqiqalardan intensiv harakat qilib, ancha oldinda pressing uyushtirdi hamda yakkakurashlarda yutib chiqa boshladi.

Mehmonlar o‘yinning 70 foiz vaqtida to‘pga egalik qildi, ammo o‘yinni «Atletiko» nazorat qildi. O‘yinning 7-daqiqasidayoq Erik Garsiya o‘z jamoasi darvozasini ishg‘ol etib qo‘ydi: bu vaziyatda maydon holati kataloniyaliklarga pand berdi, to‘p do‘nglik tufayli sapchib ketdi va darvozabon Joan Garsiya uni to‘xtata olmadi.

Bu «Barsa» darvozaboni uchun mavsumdagi to‘rtinchi golli xatoga aylandi. Bu borada undan yomonroq ko‘rsatkich faqat «Jirona» posboni Paulo Gassanigada – 6.

7 daqiqa o‘tib Garsiyaning ampluadoshi Musso boshlab bergan hujumni Antuan Grizmann gol bilan yakunladi va sobiq jamoasiga urgan golini nishonladi.

«Barselona» o‘yinning borishini o‘zgartirishga harakat qildi, ammo Fermin Lopesning zarbasidan keyin to‘p darvoza to‘siniga bordi. «Atletiko» esa o‘z vaziyatlaridan foydalanishda davom etdi. 33-daqiqada hisob yirik ko‘rinishga keldi: Alvares ayyorona harakat bilan to‘pni o‘zidan yaxshiroq pozitsiyada turgan Ademola Lukmanga o‘tkazib yubordi va madridliklarning qishdagi xaridi olis burchakni aniq nishonga oldi.

«Barsa»da esa bu vaqtgacha darvoza sohasiga to‘g‘ri borgan birorta zarba yo‘q edi.

37-daqiqada Flik hujum chizig‘ini kuchaytirish uchun Kasado o‘rniga Levandovskini tushirdi. Tanaffus arafasida Fermin Lopesda yana bir vaziyat bo‘ldi, ammo u Musso bilan duelni boy berdi.

Birinchi bo‘limga qo‘shib berilgan daqiqalarda esa Lukman Alvaresga qarzini qaytardi – 4:0.

Flik jamoasining himoyadagi harakatlarini quyidagi kadr yaqqol ifodalaydi – jamoa raqibga juda ko‘p erkinlik taqdim etdi.

O‘yin taqdirini hal qilib bo‘lgan mezbonlar ikkinchi bo‘limda kuch tejab o‘ynadi, ammo gol o‘tkazmadi. 52-daqiqada to‘p baribir Oblak qo‘riqlayotgan darvozaga kirganida esa, VAR golni bekor qildi.

Bu vaziyat yetti daqiqa davomida tekshirildi hamda yakunda Levandovskida kichik ofsayd holati qayd etildi.

Qolgan vaqt mobaynida «Atletiko» hisobdan kelib chiqib o‘ynadi va o‘z jarima maydoniga olib boruvchi barcha yo‘llarni yopib tashladi.

Mehmonlarda jarohat tufayli safdan chiqqan Pedri, Rafinya va Reshford kabi asosiy tarkib futbolchilari yo‘qligi bilindi. Javob o‘yinida esa Erik Garsiya ham maydonga tusha olmaydi – o‘yin oxirida u so‘nggi umid foli uchun qizil kartochkaga loyiq ko‘rildi.

«Atletiko»da 2013 yildan buyon ilk kubokni qo‘lga kiritish uchun yaxshi imkoniyat yuzaga keldi – 3 mart kuni «Kamp Nou»da o‘tadigan uchrashuvda kambek amalga oshishiga kataloniyaliklarning eng ashaddiy muxlislari ham ishonmayapti. Yarimfinalning ikkinchi juftligi esa «Atletik» va «Real Sosiyedad»dan tarkib topgan (birinchi o‘yinda «Real Sosiyedad» safardan minimal hisobdagi g‘alaba bilan qaytgan – 1:0).

Angliya: chempionlik poygasi qizimoqda

APL. 26-tur
«Brentford» – «Arsenal» 1:1
Gollar: Lyuis-Potter (71) – Madueke (61).
«Brentford»: Kelleher, Ayyer, van den Berg, Henri (Hiki, 90+5), Yyensen, Kayode, Lyuis-Potter (Damsgor, 73), Tiago, Uattara, Yanelt, Yarmolyuk (Henderson, 73).
 «Arsenal»: Rayya, Gabriel, Moskera, Timber, Inkapiye (Kalafiori, 81), Rays, Subimendi, Eze (Edegor, 46), Madueke (Saka, 70), Trossar (Martinelli, 81), Yokeresh.
Ogohlantirishlar: Yanelt (4), Gabriel (20), Yokeresh (30), Yyensen (53), Uattara (86).

«Arsenal» 26-turda «Brentford» mehmoni bo‘ldi. O‘ziga xos Londor derbisida ikki jamoaga ham turnir jadvalidagi vaziyat tufayli ochkolar kerak edi: «Arsenal» «Manchester Siti» bilan oradagi olti ochkolik farqni tiklashni, «Brentford» – Chempionlar ligasiga yo‘llanma beruvchi o‘rinlarga chiqib olishni maqsad qilgandi.

Birinchi bo‘lim ancha zerikarli kechdi: mezbonlar o‘z jarima maydonida tig‘iz joylashib, tartibli himoyalandi va qarshi hujumlarga urg‘u qaratdi, «Arsenal» to‘pga egalik qilgan bo‘lsa-da, yaqqol golli vaziyatlar yarata olmadi.

45 daqiqalikdagi eng xavfli vaziyat mehmonlar darvozasi tomonga bo‘ldi. 22-daqiqada «Arsenal» darvozaboni David Rayya Igora Tiyagoning boshda yo‘llagan kuchli zarbasidan keyin jamoasini qutqarib qoldi.

Ikkinchi bo‘limni «Arsenal» bosh murabbyi Mikel Arteta Eberechi Eze o‘rniga jamoa sardori Martin Edegorni tushirish bilan boshladi. Mehmonlar hujumda faolroq harakat qila boshladi va golli vaziyatlar yuzaga keldi. 48-daqiqada Leandro Trossarning zarbasidan keyin to‘p «Brentford» himoyachisining qo‘liga tegdi, ammo hakam buni penalti uchun yetarli emas deb hisobladi. Keyinroq Edegor yaxshi vaziyatdan zarba berdi, ammo to‘p yuqoridan o‘tib ketdi.

Voqealar rivoji golga qarab ketayotgandi va bu gol urildi. 61-daqiqada Piyero Inkapiye chap qanotdan darvozabon hududiga to‘p oshirdi, Noni Madueke esa boshda u qadar kuchli bo‘lmagan, lekin aniq zarba yo‘lladi va to‘p Kelleher qo‘riqlayotgan darvoza burchagiga borib tushdi.

Shundan keyin mezbonlar uyg‘onishdi. Avvaliga Igor Tiyago yana bir bor xavfli zarba berib, Rayyaning hushyorligini tekshirib ko‘rdi. 71-daqiqada esa «Brentford» futbolchilari golli hujum o‘ylab topishdi. Mikayel Kayode aut ijro etishdan oldin to‘pni uzoq vaqt sochiq bilan artdi. Bu bejiz emasdi: u otgan to‘p avvaliga jarima maydonidagi Sepp van der Bergga yetib bordi, undan Kin Lyuis-Potterga oshirildi. Va 170 santimetr bo‘yga ega futbolchi to‘pni mehmonlar darvozasiga kiritib yubordi.

Hisob tenglashganidan keyin mezbonlar g‘alaba uchun o‘ynadi. «Arsenal» esa birinchi bo‘limdagi holatiga qaytib qoldi. «Brentford» g‘alabani ilib ketishi ham mumkin edi, ammo 87-daqiqada Tiyago juda qulay vaziyatni qo‘ldan chiqardi: u darvozabon bilan yakkama-yakka vaziyatdan zarba berdi, ammo ortdan yetib kelgan himoyachi Kristiyan Mosker to‘p yo‘liga oyoq qo‘yishga ulgurdi.

Qo‘shimcha daqiqalarda ikki jamoada ham bittadan yaqqol vaziyat bo‘ldi. 90+2-daqiqada Tiyago «Arsenal» jarima maydoniga yorib kirdi va kuchli zarba berdi – to‘p to‘sin yuqorisidan o‘tib ketdi. Bir daqiqa o‘tmay Gabriel Martinelli «Brentford» darvozaboni bilan yakkama-yakka vaziyatga chiqib bordi, ammo masofani qisqartirgan Kelleherni alday olmadi.

«Arsenal» so‘nggi olti turda to‘rtinchi bor ochko yo‘qotdi (3 durang va bir mag‘lubiyat). Natijada endi ikkinchi o‘rinda kelayotgan «Manchester Siti» bilan oradagi farq to‘rt ochkogacha qisqardi. Mavsum yakuniga hali 12 tur bor, lekin chempionlik masalasi katta ehtimol bilan aprel oyida ushbu jamoalarning o‘zaro o‘yinida hal bo‘ladi.