«Barselona» Ispaniya kubogida «Atletiko»dan uchralgan yirik mag‘lubiyatdan (0:4) keyin o‘ziga kela olmayapti. Endi Ispaniyaning amaldagi chempionlari Kataloniya derbisida «Jirona»ga mag‘lub bo‘lishdi.
«Jirona» – «Barselona» 2:1
Gollar: Kubarsi, 59 (0:1). Lemar, 62 (1:1). Beltran, 87 (2:1)
Aniq ijro etilmagan penalti: Yamal, 45’
«Jirona»: Gassaniga, Vitor Reys, Blind, Martines, Rinkon, Lemar (Beltran, 67), Vitsel, I. Martin (Franses, 90), Hil (Roka, 68), Tsigankov, Vanat (Echeverri, 74)
«Barselona»: X. Garsiya, Kubarsi, E. Garsiya (Arauxo, 73), X. Martin (Balde, 63), Kunde, de Yong, Olmo (Bernal, 80), Fermin Lopes, Rafinya (Barji, 64), Yamal, Torres (Levandovski, 73)
Ogohlantirishlar: E. Garsiya, 41. Kunde, 84
Chetlatish: Roka, 90
Hans-Diter Flikning Madriddagi og‘ir mag‘lubiyatga reaksiyasi boshlang‘ich tarkibda ikki o‘zgarish qilish bo‘ldi. Martin chap qanotda Baldening o‘rnini egalladi, bundan tashqari, Rafinya asosiy tarkibga qaytdi (natijada bu safar Kasado boshlang‘ich tarkibdan o‘rin olmadi). O‘yin debyutida «Jirona» pressing uyushtirdi, «Barselona» esa to‘pni o‘z jarima maydoni atrofidan olib chiqishga harakat qildi. Lekin bu jarayon uzoq davom etmadi va ko‘p o‘tmay ko‘k-anorranglilar tashabbusni to‘liq o‘z qo‘liga ola boshladi. Birinchi bo‘limda mehmonlarning to‘pga egalik qilish bo‘yicha ustunligi kutilganidek 70 ga 30 ko‘rinishini oldi.
Yamal o‘yinning 17-daqiqasidayoq hisobni ochishi mumkin edi, ammo to‘pni darvozabon ustidan oshira olmadi. «Jirona» esa ukrainalik hujumchisi Vladislav Vanat orqali javob qaytardi: Garsiya uning bir necha xavfli zarbalarini qaytarishiga to‘g‘ri keldi.
Bo‘lim oxirida mehmonlar bosimni kuchaytirishdi, 43-daqiqada Rafinyaning zarbasi darvoza ustuniga tegdi. Ko‘p o‘tmay bu bosim natija keltirdi: Deyli Blind jarima maydoni ichida xato qildi va Dani Olmoning oyog‘ini bosib oldi.
Yamal to‘pni oldi, «nuqta»ga yaqinlashdi va ustunni poyladi.
Lekin bu holatda raqib futbolchilari zarba berilgunicha jarima maydoniga kirib ketishgandi va ustundan qaytgan to‘pni uzoqlashtirishda bu ularga qo‘l keldi.
