Telegram blokirovkasi fonida: rossiyaliklar Windows bilan muammolardan shikoyat qilmoqda

Rossiyadagi Windows foydalanuvchilari ushbu operatsion tizim uchun yangilanishlarni olishda qiyinchiliklarga duch kelgan. Yangilanishdan keyin rossiyaliklar “o‘limning qora ekrani” (black screen of death) va kompyuterning uzoq vaqt yuklanishi haqida xabar bergan, deb yozdi seshanba, 17 fevral kuni Shot Telegram-kanali.

Mash Telegram-kanali esa Windows foydalanuvchilariga yangilanishlar kelmay qolayotganini bildirgan. Yangilanishlarni yuklab olishga uringanda tizim “Microsoft yangilanish serveri bilan ulanish yo‘q” degan xato xabarini chiqargan va “qotib” qolgan, deb yozadi Mash. Ta’kidlanishicha, muammo ham litsenziyali nusxa egalarida, ham soxta versiya foydalanuvchilarida kuzatilmoqda.

Kanal mualliflari buni Rossiyada Telegram ishi sekinlashtirilishi fonida provayderlar internet-trafikni yanada qattiqroq filtrlay boshlagani bilan bog‘lamoqda.

Shu bilan birga, aloqa, axborot texnologiyalari va ommaviy kommunikatsiyalar sohasida nazorat bo‘yicha federal xizmat — Roskomnadzor Windows servislari ishidagi muammolar haqidagi xabarlarga izoh berib, hech qanday cheklov kiritmaganini aytdi. «Windows servislariga nisbatan vakolatli organlardan qarorlar kelib tushmagan, ularga qarshi cheklov choralari qo‘llanmayapti», — deya Roskomnadzor bayonotini keltiradi TASS va RIA “Novosti” agentliklari.

Roskomnadzor 10 fevral kuni Telegram ishini maqsadli ravishda sekinlashtirish niyatini rasman tasdiqlagan. Idora “izchil cheklovlar” joriy qilishni rejalashtirishini bildirgan. Regulyator rasman bu choralarni “Rossiya qonunchiligining buzilishi” va “fuqarolar xavfsizligi”ga tahdid bilan izohlamoqda.

Internet-senzura bo‘yicha ekspertlar esa Rossiya hokimiyatining asl maqsadi — YouTube va WhatsApp holatida bo‘lgani kabi Telegram’ni bosqichma-bosqich siqib chiqarish va RFda foydalanuvchilarni davlat nazoratidagi messenjerlarga, eng avvalo Max va VK’ga o‘tkazish uchun sharoit yaratish, deb hisoblaydi.